Mizoram-a COVID-19 hri kai 53.46% enkawl dam tawh

Zirtawpni kalta-a Mizoram-a Sample enfiah atangin COVID-19 hri kai hmuhchhuah thar 29 zet an awm laiin Inrinni-a Sample enfiah ah hri kai hmuhchhuah thar an awmlo thung.

Zirtawpni khan ZMC Laboratory-ah Swab Sample 238 enfiah leh niin COVID-19 hri kai mi 28 hmuhchhuah leh an ni a, heng mite hi an vaiin mipa vek an ni a. Border Security Force (BSF) sipai 28 niin, kum 25-52 inkara upa, India ramchhung hmun hrang hrang atanga lo haw khawm leh Quarantine Facility-a awm lai vek an ni. Inrinni khan ZMC Laboratory-ah Swab Sample 251 enfiah leh niin hri kai hmuhchhuah erawh an awmlo thung a ni.

Zirtawpni vek khan Kolasib District-a Counter Insurgency and Jungle Warfare School (CIJWS), Vairengte hnuaia Lailapur Quarantine Centre a awm mek sipai pakhat chu Rapid Antigen Test hmangin COVID-19 positive a ni tih hmuhchhuah a ni bawk a, amah hi CIJWS a sipai, kum 29 a upa hnamdang niin Military Hospital, Masimpur ah dahluh a ni a. Lunglei-a TrueNat khawl hmanga Sample enfiah ah erawh hri kai hmuhchhuah an awmlo thung.

Heti hian Mizoram-ah COVID-19 hri kai mi 361 hmuhchhuah ni tawhin nimin-a enkawl dam mi 10 te nen mi 193 te chu enkawl dam an ni tawh a, mi 168 te chu enkawl mek niin, hri kai zawng zawng atanga chhutin zaa 53.46 chu enkawl dam an ni tawh a ni. Mizoram-a hri kai hmuhchhuah 361 zinga mi 156 (43.21%) te chu Forces (BSF/AR/NDRF/Army) te an ni a, midang 205 (56.79%) chu Civilian an ni thung a. Mizoram-a hri kai enkawl mek zinga a tam zawk mi 131 (77.97%) te chu Forces (BSF/AR/NDRF/Army) niin midang 37 (22.02%) chu Civilian an ni bawk.

India-a hri kai hmuhchhuah nuai 14 tling dawn hnai :

Darkar 24 kalta chhung khan India ramah COVID-19 hri kai hmuh thar 48,661 zet an awm leh a, India rama hri kai hmuhchhuah hi nuai 14 an tling dawn hnai tawh a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah hian Sample 4,52,263 enfiah leh niin heng atang hian hri kai 48,661 zet hmuhchhuah leh an ni a, heng te nen hian India-a hri kai hmuhchhuah hi 13,85,522 an tling tawh a, Vawiin lam hi chuan nuai 14 hi tling mai tura ngaih a ni.

India rama hri kai zingah hian 8,85,576 te chu enkawl dam an ni tawh thung a, hei hi hri kai hmuhchhuah atangin zaa 63.91 an tling a, tunah hian hri kai enkawllai 4,67,882 awm mekin hri kai zingah nunna chan mi 32,063 an awm tawh bawk a, hri kai atanga chhutin nunna chan hi zaa 2.31 an tling bawk. Tun thlengin India ramah hian Sample enfiah zat chu 1,62,91,331 a tling tawh bawk a ni.