NH. 54 laihzauh chungchangah FIR thehlut

Chhingchhip khaw bul-a National Highway laihzauh hna thawh mekah Community Forest Reserve tihchhiat chungchangah Serchhip Police Station-ah FIR thehluh niin ramngaw tihchhiat hlutna pek a nih hma chuan hnathawh chawlhsan tura an phut thu tarlan a ni.
Hemi chungchanga Serchhip Police Station-a Ramngaw hmangaih leh humhalhtu ti-a PC. Vanneiha’n FIR a thehluh ah chuan Chhingchhip dai, B. Doliana (L) huan hnuai, Community Forest Reserve chu National Highway laitu Company ten leivung paihna atan an lo lai chhe vek nia tarlangin, helai ram hi Mizo Lal lal lai atanga ramngaw humhalh a nih thu a tarlang a. Mipui remtihna la lova hetianga ngaw thiah a ni mai chu a hriatthiam loh thu leh ramngaw hmangaihtu thinlung a na nia tih FIR a thehluh ah hian a tarlang a. Hei vang hian helai ramngaw-a hmalakna te hi tu thu hmu-a ti nge an nih tih te, Agreement ziah a ni em tih leh Agreement chu enge tih te chhui sak tur leh an ramngaw tihchhiat hlutna ang chu khawtlang-ah ah pek ngei an phut thu leh an ramngaw tihchhiat hlutna an pek hma chu an hnathawh lo chawl (Stay) tura a phut thu te tarlangin, heng te hi chhui sak tur leh hma lak sak turin Police te chu a ngen bawk a ni.
Chhingchhip-a VC Member pakhat hnen atanga thu kan dawn danin nimin a hetianga FIR thehluh a nih hnu hian Chhingchhip-a pa thenkhat te chu helai hnathawhna hmunah hian kalin FIR an thehluh thu leh Court-a thu te kal thei a nih avangin an hnathawh kallai chu chhunzawm tawh rihlo turin hnathawktute chu an ngen a, Company lam pawh hian harsatna lutuk siam lovin an hnathawh te tifelin an hna kallai hi an titawp lailawk ve nghal nia thudawn a ni bawk.

Comments

Chhiar Hlawhte