Chanchin thar thenkhat :

Rajya Sabha MP lakluh a ni

Mizoram Rajya Sabha MP atana thlan thar, K, Vanlalvena chu nimin khan Mizoram Rajya Sabha Member atan rinawmna thu tiam tira lakluh a ni ta. Mizoram Rajya Sabha Member tur thlanna neih zawh taka thlantlin, K. Vanlalvena hi nimin khan New Delhi-a Parliament House-ah Mizoram Rajya Sabha member ni turin rin-awmna thu tiam tira lakluh a ni a, hri lenlai a nih avangin K. Vanlavena hi thutiam la tur hian amah a kalin Mizorama a rawn haw leh huna Quarantine Period a hman zawh hunah theihtawp chhuaha hma a lâk tan tur thu a sawi bawk.

K. Vanlalvena hi K. Lalzika fapa niin January 14, 1970 khan Serchhip District chhunga East Lungdar khua ah a piang a, a thenawm North Mualcheng khua ah a seilian thung a. MZP lamah hruaitu hna te pawh lo chelh tawhin June 19-a Mizoram Rajya Sabha MP thlanna neih ah MNF Ticket-a thlantlin a ni a, Rajya Sabha MP thlanna ah hian Mizoram-a vote 40 awm ah vote 39 tlain K. Vanlalvena hian Vote 27 a hmu a, Mizoram Rajya Sabha MP kalchhuak ta, Ronald Sapa Tlau chu a thlak ta a ni.

MP (RS) kalchhuak thlah

Mizoram Pradesh Youth Congress Committee (MPYCC) chuan nimin khan Mizoram Rajya Sabha MP kalchhuak, Ronald Sapa Tlau thlahna hun Aizawl-a Congress Bhavan-ah an hmang. MPYCC in Rajya Sabha MP kalchhuak thlahna hun an buatsaih hi MPYCC Vice President, F. Lalngaihawma chuan kaihruaiin ngaih-hruina thuziak chu MPYCC President, Dr. Lalmal-sawma Nghaka chuan hlanin, “Thalaite min ngaihsaktu leh Zoram tana ngaihtuahna zawng zawng sengtu Pu Ronald Sapa'n a term a hmang zo thei hi kan lawmpui em em a, kan ui tak zet bawk a ni,” tiin Ronald Sapa Tlau pawhin MP Term a hmang zo thei chu lawmawm a tih thu a sawi bawk.

CM hovin Ar vulh sawiho

Nimin khan Chief Minister, Zoramthanga hovin AH& Vety Minister Dr. K. Beichhua leh Department hotuten Ar vulhtute hamthatna tur chungchang Chief Minister Office ah an sawiho. He sawihona hunah hian phai atanga Ar note leh Ar chaw chawkluh ngai lova tualchhunga into-delh theihna tur kawng ruahmanna awm hrang hrangte chu sawiho niin Ar chaw chungchangah hian man tlawm zawka Ar chaw siamchhuah leh supply theih dan tur zirchian nise tih a ni. Mizoram-in kar khat a Ar note a mamawh zat hi tun dinhmunah 60,000 nia chhut a ni a. Vety Department Hatchery-a Ar note awp keu theih zat chu kartin 20,000 vel a ni a. Hemi Production-Supply Gap hnawhkhah nan hian Rural Infrastructure Development Fund (RIFD) hnuaia hmalak tum a ni.

Minister in tlawh chhunzawm

Law & Judicial Minister, TJ. Lalnuntluanga chuan East Tuipui bial-a lirnghing avanga chhiatna hrang hrang tuarte chu tlawh mekin nimin khan Khuangthing, Zawlsei, Khawbung, Leithum leh Khuangleng khuate tlawhin Village Level Disaster Management Committee-te leh khawtlang hruaitute kawmin chhawmdawlna a hlan a. Minister tawiawmtu Champhai SP, Rex Zarzoliana chuan chhiatna thlen thulha chet la nghal mai thei tur, State Disaster Response Force (SDRF) mi 10 te Dungtlang Police Station-ah dah an nih thu sawiin, chhiatna thlen thulha chet lak dan tur zirtirna khaw tinte tan a theih chen chena kalpui thuai tum anih thu a sawi bawk.

Hnahlan-ah Grape her tan

Mizoram Cooperative Development Council Vice Chairman, Dr. ZR. Thiamsanga MLA chuan nimin khan Hnahlan Winery chu a tlawh a, Hnahlan Grape Growers’ and Processing Cooperative Society hian kumin hian an Winery-a her turin July thla atanga khan Grape Quintal 200 vel leiin nimin-a a her tanna hun buatsaih chu a hmanpui nghal bawk a ni.

ZPM in sawrkar an zawt

ZPM General Hqrs. chuan phai lam atanga Mizoram rawn haw te Quarantine-a an senso te anmahni intum tawh tura tih a ni chu a makin mipui a barakhaih hle tih thuchhuah siamin an tarlang a. CMRF leh COVID puala sawrkar laipui atanga tanpuina sum kan hmuh zozai te khan a daih ta lo nge, engvanga sum leh paia harsatna tawk ta nge kan nih tih chu Mizoram sawrkar an zawt bawk.

Insawifiah turin hriattir
Tun thla ni 20-a ZMC Laboratory-a Swab Sample Test result chhuakah ZMC-a Doctor pakhat in COVID-19 hri a kai tih hmuhchhuah a nih avangin nimin khan Secretary, H. Laleng-mawia hovin Principal Director, Dr. F. Lallian-hlira leh Zoram Medical College hotute chu ZMC-ah an thukhawm a, he hunah hian Health Secretary chuan he thil thleng hi sawrkar chuan pawi a tih thu leh a la thutak hle tih a sawi bawk. COVID-19 hri kai hmuhchhuah Doctor hian inkaihhruaina dan a bawhchhia ni a a lan avangin Sawrkar chuan insawifiah tura hriattirna pein July ni 27, 2020 ralhma ngeia in sawifiah turin a hriattir a ni.