TKP dinchampha hmang

Nimin July 30, 2020 kha Baptist Church of Mizoram (BCM) hnuaia Thalai Kristian Pawl (TKP) dinchampha vawi 69-na niin kumdang anga a lawmna erawh neih theih a nilo thung. Kumin-a Thalai Kristian Pawl (TKP) dinchampha-ah hian thupui atan 'Lalpa hman tlak' (II Tim. 2:21) chu hman niin kumdangah chuan he Ni hi urhsun taka hmangin midangte tana thil tha tihna atan te hman thin a ni a, kumin ah erawh chuan hri leng avanga punkhawm leh hnatlang neih te a remchan loh avangin MTKP Executive Committee Meeting chuan Mizoram hmun hrang hrang leh Mizoram pawna TKP member ten TV leh Youtube kaltlanga an lo hman theihna turin Programme an buatsaih thung a ni.

Nimin-a TKP Day pual hian BCM Ser-chhip Edenthar-a TKP Unit te chuan Serchhip Blood Bank-a dah turin thisen Unit 18 an pe a, thisen petute hi mipa 10 leh hmeichhia 8 niin Serchhip Blood Bank-ah kalin thisen hi an pe a. TKP New Serchhip Unit te pawhin TKP Day puala Bible chhiarchhuah Programme chu nizan dar 7:00 atang khan an kalpui bawk a ni.

Kohhran-a thalaite puala rawngbawlna huang zauh tur hian uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh Kohhran Upate chuan Zosap Missionary-te kaihhruaina hnuaiah 'Krista leh Kohhran tan' tih thupui-a hmangin Thalai Kris-tian Pawl (TKP) hi din a ni a. MTKP Organiser report-in a tarlan danin TKP te hi Pastor Bial 85-ah Unit 427 an awm mek a. TKP member Hmeichhia 18,050 leh Mipa 28,944, an vaiin 46,994 an awm mek a ni.