Chanchin thar thenkhat :

Maubuang-ah PACS hawng

Cooperation Minister, C. Lalrinsanga chuan nimin khan Maubuang-ah Primary Agriculture Credit Co-operative Society (PACS) Ltd. a hawng a, Consumer Co-operative Society behchhana Primary Agriculture Credit Co-operative Society (PACS) Ltd. an din thei chu lawmawm a tih thu a sawi a. Kum 18-40 inkar in an hmantheih Farmer's Pension Scheme chu ngai pawimawh tura he huna tel te chu chahin, Common Service Centre (CSC) hnai bera in register thar leh turin a ngen a. Kut hnathawktuten kum 60 an kai huna thla tin Pension Rs. 3000/- zet thlatin an lak theihna tur Scheme tha, Mizoram puma hmang thei tur mi 200 bawr vel chauh an awm chu pawi a tih thu a sawi bawk. Maubuang Consumer Co-operative Society hi kum 1974-ah din a ni a, kum 1994-ah Retailer hna an thawk tan a, Maubuang atanga Bank dawr tura Aibawk-a kal zel a tul avangin PACS hi hawn a ni ta a ni.

Aadhaar siamtute lungawilo
District hrang hranga DC hnuaia Aadhaar Enrollment Agency-a thawktute chuan hun rei tak hlawh an lak tawh loh avanga an lungawilohna lantir nan nimin atang khan tiamchin awm lovin an in khar. Association of Mizoram Aadhaar Operators (AMAO) President, Lalruatfela Sailo chuan Aadhaar Enrolment Agency-a thawktute chuan sawrkar kum 2019-2020 leh 2020-2021 chhunga an hlawh bakah Aadhaar thar siam apianga an thlalakna man, Generate per Head an hmuh tur chu an hmu tawh lo tih sawiin, an harsatna an thlen in ngaihsak a hlawh loh avangin hetiang hian hma an la ta tih a sawi bawk.

MADC thutkhawm zofel
Ni 2 chhung awh, Mara Autonomous District Council (MADC) Fur thutkhawm chu nimin khan zawhfel a ni a, nimin thutkhawm ah MADC Chairman hlui, Hiphei sunna hun hmangin zawhna leh chhanna hun hman a nih bakah Rules pathum te chu pawm niin The Mara Autonomous District (Assessment) Bill, 2020 pawh pass a ni bawk.

CM hnenah harsatna thlen
Mizoram Industry Owners Assoction (MI-OA) hruaitute chuan niminpiah khan Chief Minister, Zoramthanga chu a Office-ah hmuin Industry din dawna Power Line pawhman hautak lutuk chungchang leh sawrkarin Industry din tharte tana hamthatna a siam, State Incentive Subsidy (SIS) chu hripui leng avanga harsatna lian tak an tawh mek avanga pechhuak turin an ngen a. MIOA President, F. Rodingliana chuan Chief Minister hian Industrial Centre-a Tui, Power Supply leh kawng chungchanga an harsatna te a hmuna kala enfiah leh tanpui theihna kawng a awm chuan puih a in huam thu alo sawi nia sawiin, SIS chungchangah pawh hmalak a tum thu a lo hrilh niin a sawi bawk.

MZP in hmalakna tur an rel
MZP General Hqrs. chuan nimin khan Aizawl-a an Office-ah Executive Meeting neiin Myanmar a India khua leh tui mi 200 chuang tangkhang mekte chu Mizoram Sawrkarin a rang thei ang bera hruai haw dan tur ngaihtuah a, a tul dan zira Central Sawrkar pawh dawr-a kan unau tangkhangte hruai haw vat turin an ngen a. MZP in Zofa hnam peng hrang hrangte tana kum khat dan-a khawmpui an huaihawt thin, Zofest chu a tum 9-na atan hri leng zawh hun remchang ah buatsaih leh nise tiin Organising Committee an din nghal a. Tunhnaiah sawrkar hnathawh pension rawih nawn an awm nia an hriat thu sawiin, hmalak an rel nghal bawk.

Ke 2 nei-a tlanluh khap
Mizoram sawrkar-a Home Department chuan nimin khan thuchhuah siamin thu leh awm hma chuan lirthei ke pahnih nei chi (Two wheeler) hmangin State pawn atangin tumah luh phal a ni tawh lo tih an tarlang a. Lirthei ke pahnih nei hi kawng lakah an ding fo a ngaih avangte, COVID-19 tidarh theitu an nih theih a rinawm avangte, State pawna atanga lo lut te awlsam zawka chhinchhiah an nih thei nan leh mipui te himna ngaihtuahin he khapna thupek chhuah anih thu an tarlang bawk.

Comments

Chhiar Hlawhte