Health Minister-in Assam Rifles, BSF leh BRTF hotute COVID-19 laka inven dan tur a sawipui

Health & Family Welfare Minister, Dr. R. Lalthangliana chuan nimin tlai khan a Pisa-ah Mizoram-a Assam Rifles (AR), Border Security Force (BSF) leh Border Roads Task Force (BRTF) hotute kovin Mizoram-a COVID-19 darh zel tur veng tura hmalak dan tur a sawipui.

Health Minister in Assam Rifles, BSF leh BRTF hotute hri leng chungchang a sawipuina ah hian Health Minister chuan tun dinhmunah Mizoram-a COVID-19 vei mek 129 zinga 99 (76.74%) chu Sipai, Para-Military Force Mizoram-a awm mekte zing ami an ni tih sawiin, an mi leh sa te Mizoram-a lolut leh Mizoram atanga chhuakte uluk tak leh fimkhur taka chhinchhiah a enzui turin sipai hotute a hrilh a. An Camp chhungah COVID-19 vei enkawlna tur, COVID Care Centre (CCC) buatsaih dan tur sawipuiin, Health Department Official-te nen a rang thei ang bera a hmuna en an tum a ni.

Health Minister Dr. R. Lalthangliana chuan sipai ho chu Mizoram chhunga an awm avanga fimkhur tura hrilhin, Mizoram sawrkar-in hri leng chungchanga dan leh hrai zawm tur a siamte uluk tak leh fimkhur taka zawm turin a hrilh a, Mizoram hmun hrang hranga inzarpharh an nih avangin an fimkhur lehzual a ngai hle tih sawiin, hmun hrang hranga an Camp-a awm sipaite chu COVID-19 chungchanga inkaihhruaina tha taka zawm tura hriattir tur leh uluk taka enzui turin a chah bawk.

Hei bakah hian tunah sipai COVID-19 vei mekte enkawl dam an nih hnu a an Camp lama an kir hunah pawh sawrkar ruahman angin ni 7 chhung uluk taka Self-Monitoring tih tir ngei ngei turin Health Minister chuan a chah a. Anmahni atanga thil tih remchanglo a awm a nih pawhin Mizoram Sawrkar chu a tul apianga pui turin a inring reng tih sipai hotute chu hrilhin, tha tak leh langtlang taka an thawhho a pawimawh thu a hrilh bawk a ni.

He hunah hian heng Sipai leh BRTF aiawhte pawhin an dinhmun te an sawi a, Health Minister hi Health Secretary, H. Lalengmawia leh Health Principal Director Dr. F. Lallianhlira ten an tawiawm a ni.