SBI Foundation kaltlangin Ventilator 3 hlan

SBI Foundation chuan Mizoram Sawrkar hnenah nimin khan cheng nuai 5 hu Ventilator pathum (3) an hlan a, heng Ventilator te hi SBI Foundation aiawhin L.P. Lalchangkima, Regional Manager, SBI leh a thawhpui ten Health Minister, Dr. R. Lalthangliana hnenah an hlan a ni.

Heng Ventilator hlanna hunah hian Health Minister Dr. R. Lalthangliana chuan SBI Foundation leh SBI te inpekna chu ropui a tih thu sawiin, lawmthu a sawi a. Bank te chu mipui tana thawk, mipui ta an ni tih sawiin, an thil pek hian mipuite ta an nih bakah mipuite rawngbawlsaktu an nih zia a lantir tih a sawi.

Health Minister chuan COVID-19 hripui leng dona kawngah harsatna tam tak kan hriat ngailoh leh beisei ngailoh kan tawng tih pawh sawiin, hetiang boruak kara pawl leh mimal in phal te malsawmna ni tura an luang chhuak thin chu a lawmawmin he hripui hneh thei ngei tur pawh hian fuihna thar min pe thin a ni, a ti bawk.

SBI Regional Manager, L.P. Lalchangkima chuan Ventilator-te hi SBI Corporate Social Responsibility (CSR) kaltlanga pek ni lovin, SBI malsawmna dang ‘SBI Foundation’ kaltlanga pek a nih thu a sawi a. CSR kaltlangin Mizoram sawrkar hnenah June thla khan PPE Set 600 pek a lo nih tawh thu leh Centilator hi a dang pek belh leh turin ruahmanna siam mek a nih thu a sawi bawk. SBI Foundation hi India rampuma SBI hnathawkten an phal anga sum an thawh atanga din niin rampum ah thilpek hrang hrang an lo hlan tawh thin a ni.