Minister in lungphum phum

Sports & Youth Service Minister, Robert Romawia Royte chuan nimin khan Muallungthu Hockey Ground-a Synthetic Turf phahna tur lungphum a phum.

Lungphum phumna puala inkhawm tawi neih ah Sports Minister chuan New Education Policy siam mek angin Sports leh Physical Exercise chu Co-Curricular Activity (zirna peng khat) ni tawh lovin Curriculum (zirna pang-ngai)-ah a tel tawh dawn, tih sawiin, English, Mathematics subject te angin sports chu subject a ni chho tawh dawn a ni, a ti a. He ruahmanna thar avang hian Mizoram pawhin nasa takin Sports Infrastructure siam belh kawngah tanlak a tul a ni, a ti bawk.

Sports Minister chuan Mizoram Sawrkar leh mipuiin COVID-19 avangin sum kan mamawh tih sawiin, Mizoram budget ei hek lova Sports & Youth Services Department-in hmasawnna rahbi a tuk chho mek chu lawmawm a tih thu sawiin, Officer leh staff te fakawm a tih thu a sawi a. “Zirna, thiamthil (skill development) leh Sports-a hmasawnna tluantling a thlen theih nan Sports School tha kan mamawh tih hriain Mizoram hmun 5-ah Residential Sports School 5 dinna turin ruahmanna siam a ni a, vanneihthlak takin Central Sawrkarin cheng nuai 16751.70 lai a sanction a, 50% chu Sports Department-ah allocate tawh a ni,” a ti a. Heng Academy-ah hian Zirna tha dawng chungin zirlaiten sports an zir tak tak dawn a ni, a ti bawk.

Muallungthu-a Synthetic Hockey Turf phah tur hi Khelo India Scheme atanga sum hmuh cheng nuai 550 hmanga siam tur niin sawrkar laipui tum vek tur a ni a, Standard size, a dung 91 metres leh a vang 55 metres-a siam tur niin, Fencing, RCC Water Tanky, Water Sprinkler System leh Electric Water Pump te dah nghal vek tur a ni a. Mi 100 lenna Pavillion pawh sak nghal a ni dawn bawk a ni.