MATRIC PASS THARTE PUALIN

MATRIC PASS THARTE PUALIN

- K. Remruatfela
Kumin Matric result chu kum dang zawng aiin a tha a, a lawmawm takzet! Thiamna sâng zâwk nei tura matric pass thar ten an subject thlan kawnga puitu a nih beiseiin zirna peng pali (4) zinga Mizoten kan hriat lar ber ber pahnih Arts leh Science hi kan han khaikhin kual vel phawt ang a, a tul chuan a dang pawh kan la tarlang zel dawn nia.
A hmasain Arts awmzia hi hrilhfiah han tum hmasa phawt ila. Arts chu mihring siamchhuah thil mawi tihna a ni a. Chu chuan a huam zau hle a. Chutiang thil chu rilru-a ngaihtuah chhuaha, midang ten a mawi leh mawi loh leh, a that leh that loh an lo hriat leh hmuh ve tura engti zawng emaw tala lantir a ni tur a ni. Tichuan, lemziak mawi tak tak te, milim mawi tak tak te, thil ri mawi tak tak te leh thil reng reng hlutna nei, mihring siamchhuah thil mawi tinreng hi Arts chu a ni a. Mahse, tuikhawh-thla te, pangpar mawi tak tak te leh ni tla tur êng mawi takte chu mihring siam chhuah a nih ve loh avangin Arts chuan a huam ve lo thung! A tawi zawngin han sawi i la, mihringin a ngaihtuahna, mawi taka a rawn tarchhuahna hi ‘Arts’ chu a ni.
Chutihlai erawh chuan, Science chu thil ni chiah chiah, danglam leh chuang thei lo, chatuan thu dik hi a ni. Entirnan : Pahnih leh pahnih belh chu pali a ni; dût no hi dulah dawm beh a, a chhunga lapaw hàl veleh a ben bei chuan a bei hlen nghal (a chhunga boruak kha halral a ni a, no mawng lam atanga boruak nemna avangin) tih te; tui khat pam rialno a dahin lehkha khawngin chhin ila, han letling ila, chutah lehkha khawng vawnna thlah mah ila chhûng lam boruak nemna avangin lehkha khawng kha a tla chuang lo tihte hi khawvel awm chhunga thu dik tur a ni a, Science an ni. Chumi awmzia chu ngun taka thil enfiah a, chuta thil awmdan a zira a hnua thil awm leh chumi chhuina chu Science a ni a. Chutiang chuan Science chu thil ni chiah chiah, danglam lo a ni ta a ni.
A nihna tak chu kan lo hre ve ve ta. A khawi zawk hi nge kan mize milpui chu, a khawi zawk hi nge kan fate tana tha ang tih hre turin ngaihtuah ngun pawh a ngai hle. Mihring nungchang zirmi (Psychologist) te chuan mihringte hi hlawm lian deuh deuh pahnih-ah min then hrang a. Chung chu Extrovert leh Introvert an ti. Introvert kan tih chuan - khawtlang leh pawl thila invawrh lar vak lo, midangte kawm aia mahni tuibik thila ngawrh duh bik mi an ni a, mize zawi leh nunnêm an ni duh châwk. A lehlamah Extrovert chu - mi ti thawr thawr, a pawikhawih zâwng leh a chimawm zawng ni hauh si lova pâwn lam thil ngaina, inchhung khura thil tih chet chet aia khawtlang leh pawl tana inpe mi, midangte ho khâwm nuam ti mi an ni a. A tlângpuiin Leadership quality pawh an nei nge nge thin.
A khawi zawkah hian nge kan tel tih inenlet ila. Tlema pass that deuh hlek avanga a pawng apuia Science la ve ringawt, tlema pass na chhiat deuh hlek avanga Arts la ta ringawt ni lovin, nakina kan hmalam hun lo la kal zel tur atana kan tuipui tur zâwk chu eng nge ni tih hi kan chik zawk fo tur a ni. A dang zawng aia pawimawh ber ni fo tur chu kan nih tuma zir hi a ni a. Khawtlang thila inhman duh mi kan nih chuan Arts hi a inâwm fu a. Mahni tulbik thila ngawrh duh mi kan nih chuan Science a inhmeh leh bawk. Tin, sumdawn lama tuimi kan nih chuan Commerce lâk a inhmeh hle thung.
A khaikhâwm nâna ka tarlan duh chu matric pass tharte lawmpuina ka hlan rualin he kan thiamna leh finna te hi malsawmnaa min vurtu Pathian tana hmang theuh turin ka chah duh bawk a. He khawvel ah reilote-a ral mai tur khawvel finna zirin nasa takin kan hmanhlel thin a. Chutih laiin zirna zawng zawng zinga ropui ber chatuan daih zirna - Pathian thu zir zauna hi kan hlamchhiah bik dawn em ni? Khawvel finna kan zir tawh lo pawh a ni maithei e. Mahse chûng zawng zawng aia ropui zawk zirtur pawimawh deuh mai kan nei a. Heng ziak leh chhiar kan thiamna te hi Bible leh Pathian lehkhabu dang zir zau zêl nan a ni dawn lo’m ni?

Comments

Chhiar Hlawhte