Lirthei Chhiah pelo te Late Fee ngaihhnathiam sak

Transport Minister, TJ. Lalnuntluanga chuan Lockdown avanga Lirthei Chhiah a huna pe theilo te tan Chief Minister in Late Fee a ngaihhnathiam sak niin a sawi.
A bial chhung khaw hrang hrang fang-a thang mek Transport Minister chuan COVID-19 hrileng avangin kumin March thla chawhnu atangin lockdown kalpui a ni tih sawiin, Transport Department Office hrang hrangte mipui tan dawr hleih theih an ni lova, hetiang a nih avang hian Sawrkar laipui-a Ministry of Road Transport & Highways chuan lockdown vuakvet chhung February 1, 2020 atanga June 30, 2020 chhunga document thi te chu ngaihhnathiam nise tiin order a chhuah tih a sawi a, chumi dungzui chuan document thi te pawh man lova chhuah zalen zel thin an nih thu leh Chief Minister Zoramthanga, Finance Minister nibawk hmalaknain mipuite harsatna sutkian nan a hun taka Lirthei chhiah pelo te Late Fee ngaihhnathiam sak an nih tur thu a sawi bawk.
Transport Minister chuan Late Fee chawi lova Tax leh Fee Transport Department in a lak ngawt chu dan angin a rem lo tih pawh sawiin, Sum kaihhnawih thilah Finance Department phalna lak hmasak zel angai a, Audit hmachhawn leh thin anih avangin Transport Department hian amahin hma a la ngawt thei lova, Chief Minister leh Finance Minister ni bawk, Zoramthanga'n mipui harsatna hriain Late Fee chawi lova Tax leh Fee pek min remtih saka, a chungah lawmthu kan sawi tak meuh a ni, a ti bawk. Transport Minister chuan Late Fee chawi lova Tax leh Fee pek a hlawhtlinna tura phalna leh remtihna petu Chief Minister chungah lawmthu sawiin, a tul apiangte buaipuia chak taka hmalatu Transport Department hnuaia thawktute leh NIC a thawktute chungah lawmthu a sawi bawk.

Comments

Chhiar Hlawhte