Thudik chhuichhuaka puang turin sawrkar an phut

Congress Thalaite chuan Mizoram sawrkar chu rang taka thudik chhuichhuaka puang tura an phut thu an sawi.

Nimin a thuchhuah an siam ah Congress Thalai, MPYCC chuan April ni 26,2019-a MPYCC in Wing Commander (Rtd) J. Lalhmingliana, Principal Consultant, Civil Aviation Wing-in Civil Aviation Wing sum tam tham tak ama account-a sawrkar dankalha a dahluh avanga Lokayukta hnena complain a thehluh chu, Lokayukta-in rang taka Preliminary Enquiry/Investigation la tur leh Lokayukta-a report thla khat chhunga thehlut tura ACB a hriattir thu an tarlang a. Thla khat mai ni lo, thla riat (8) hnuah pawh engmah thawm hriat tur a awm tak loh avangin MPYCC chuan January ni 11, 2020 khan Press Release an siam leh thu leh hei hi MNF Thalai, MNYF te chuan January 14, 2020-ah chhanleta Press Release siamin, report kimchang tak thehlut tura inbuatsaih mek a nih thu leh an khawmuanna chhan chu Krismas vuakvet vang anih thu an sawi bawk tih an tarlang a.

Krismas vuakvet vanga ACB-in report thehlut lo mai an nih thu MNYF ten an sawi laiin, 2019 Krismas attnga thla 5 liam tawh hnuah pawh engmah thawm a la awm lo tih MPYCC thuchhuah chuan tarlangin, lehkha an thehluh atanga kum khat liam hnuah pawh hmalakna engmah hriattur a la awm loh avangin an ngaih a tha thei tawh lo tih an tarlang a. Zoram mipuiin thudik an hriat ngei theihna tura hnu chhui bansan lo a, rang taka hmala chhunzawm a, thudik puang vat turin Mizoram sawrkar an phut thu an sawi bawk.

Hei bakah hian Congress Thalaite chuan MPCC Media Department-in Sawrkarin PPE leh hmanraw dang a lei chungchanga thil diklo leh felhlel awm ngei nia a hriat chhui tura May ni 1, 2020-a ACB a FIR a thehluh, Lok Ayukta-in thu tling leh chhui tlaka a ngaih, ACB hnena Lokayukta a Enquiry Report pe vat tura a tih pawh pawt khawtlai lova, rei tak rial lovin rang taka thil diklo hi puanchhuah vat anih ngei theihnan theihtawp chhuah turin thuneitute an phut thu an sawi bawk.