Serchhip District-ah mi 806 khunghran theihna awmin khunghran mi 72 an awm mek

State pawn atanga Serchhip District-a rawn haw te khunghranna turin Serchhip District-ah Quarantine Facility Centre 36 siam a ni tawh a, nimin thleng khan District pumah Qurantine Facility 36-ah hian mi 806 awm theiin khunghran mi 72 an awm mek a, mi 734 khunghran theihna hmun la awmin Telangana atanga rawn haw te khunghran leh an ni ang.
COVID-19 hri leng avanga inkharkhip kalpui a nih hnuah Mizoram State pawn-a Mizoram mi leh sa tangkhang mek te hruai haw hna chu kalpui chhunzawm mek zel niin heng mite hi sawrkar chuan ni 14 chhung sawrkar-in inkhunghranna tura a ruahman ah awm tura tih an ni a, heng mite khunghranna tur hi sawrkar chuan ruahman belh zelin sawrkar in hmun 36 zet chu inkhunghranna tur hian a ruahman tawh a, tun thla ni 18-a District Bawrhsap hova Kohhran hrang hrang hruaitu ten an lo sawiho tawh angin Kohhran thenkhat Hall leh hmunhma te chu inkhunghranna atan hian ruahman fel a ni tawh bawk a ni.
Serchhip District chhungah hian Lockdown kalpui a nih khan hmun 22 chu Quarantine Facility Centre atan hian lo ruahman ni tawhin chung te chu Tourist Lodge Serchhip mi 20 awm theihna, District Hospital Serchhip (6), Agriculture Rest House (6), P&E Rest House Bukpui (7), Eklavya Model Residential School (60) N. Vanlaiphai Forest Rest House (9), N. Vanlaiphai Tourist Lodge (16), N. Vanlaiphai PWD IB (7), N. Vanlaiphai KVK Guest House (7), Thenzawl-a AYUSH Hospital (10), VC Rest House Khawlailung (5), Middle School Khawlailung (30), Thenzawl CHC (4), Thenzawl Forest Rest House (9), PHC East Lungdar (2), Highway Restaurant Chhiahtlang (16), SSA Girls Hostel Chhingchhip (30), Tourist Lodge E.Lungdar (12) leh mi 2 theuh awm theihna N. Vanlaiphai, Ngentiang, Khawlailung leh Chhingchhip-a PHC te a ni.
Hemi hnu hian District chhunga building 7 te chu Quarantine Facility Centre atan puan leh niin chung te chu mi 88 awm theihna Sainik School Chhingchhip, mi 16 awm theihna Tourist Lodge Thenzawl, mi 20 awm theihna Tribal Hostel Thenzawl, mi 80 awm theihna JNV Hostel Thenzawl, mi 6 awm theihna PWD IB Lungpho, mi 6 awm theihna Forest Rest House Serchhip, mi 8 awm theihna Golf Course & Welness Spa Thenzawl leh mi 50 awm theihna Serchhip Boxing Hall te a ni a. Hemi hnu hian mi 58 awm theihna Govt. Serchhip College Academic Building, mi 30 awm theihna Marian High School, mi 60 awm theihna Vocational Training Centre P&E Veng Serchhip, mi 20 awm theihna BCM Ebenezer Hall P&E Veng Serchhip, mi 40 awm theihna Bethel Presbyterian Kohhran Hall P&E Veng leh mi 60 awm theihna Serchhip Kawnpui Presbyterian Kohhran Hall te chu ruahman belh leh a ni tawh bawk.
Hetihlai hian nimin khan Facility Centre-ah hian mi 11 dahluh thar niin a hma ami nen mi 72 an awm mek a, In lama inkhunghrang mi 38 nen inkhunghrang mi 110 an awm mek a ni.

Comments

Chhiar Hlawhte