Assembly Special Session ko turin sawrkar phut

ZPM Thalai General Hqrs. President, Malsawmzuala chuan Mizoram Legislative Assembly Special Session ko thuai tura sawrkar an phut thu an sawi.

Nimin a thuchhuah a siamah ZPM Thalai President chuan Mizoram-a COVID-19 hripui dona kalpui mekah Local Level Task Force leh Village Level Task Force te, Kohhran, Pawl leh mimal thahnemngai ten theihtawp an chhuah zel tih sawiin, sawrkar pawhin nasa takin tan a la mek tih a sawi a. COVID-19 dona atana inkhuah-khirhna hian engchen nge a awh dawn hriat a nih loh laiin a chhe ber pawh tawk tura kan inralrin erawh kan tihmakmawh a ni, a ti a.

State sum dinhmun chu Finance changtu Chief Minister berin a sawi chian theih si loh avangin kan inrinsiak sup sup a ni ta ber tih pawh sawiin, COVID-19 dona atan leh eizawnna kalpui theih loh avanga chhuanchhama awm mekte khaichhuahna tur atana sawrkar sum hman dan tur ruahmanna tha kan neih a tul tawh takzet tih a sawi a. Hemi kawngah hian chak taka hmalakna a awm theih nan, kan ram hruaitu tura kan thlantlin ten thukhat vuaa ngunthluk taka an ngaihtuah chhuah theihna turin, Mizoram Legislative Assembly Special Session ko thuai tura sawrkar an phut thu sawiin, “COVID-19 dona atan hian tanho a ngai tak zet a, kan sawrkar hi thawhhona tha siam turin kan ngen a ni,” a ti bawk.

ZPM Thalai President chuan Lockdown leh Curfew avangin Department thenkhat te tan sum hmanna tur a awm mang dawn rihlo tih pawh sawiin, heng Department sum te hi COVID-19 dona atan hman nise a ti a. SEDP hnuaia Board din chawp leh thawktute pawh a hrana a ruatte tan hian hmalakna liantham a awm theih dawn rihloh avangin thiah a nih loh vek pawhin, sawrkar sum tihek lo zawnga COVID-19 donaa hmang tangkai turin sawrkar thuneitute a ngen nghal bawk.