Inkharkhip thawh lina atan Mizoram Sawrkar in inkaihhruaina thar a tichhuak

COVID-19 avanga Mizoram chhunga inkharkhipna thawh thumna chu nizan-a a tawp hnuah Vawiin atanga tun thla ni 31 thlengin Inkharkhip thawh lina kalpui leh a ni dawn a. Inkharkhip thawh lina atana inkaihhruaina thar pawh nimin khan tihchhuah niin Vawiin atang hian hman tan nghal a ni ang.

Nimin-a Mizoram sawrkar in Inkharkhip thawh lina atana inkaihhruaina a tihchhuah ah hian International Border leh Inter-State Border khar mekte chu khar chhunzawm an ni anga, Bairabi, Vairengte leh Kanhmun kaltlang kawngpuite erawh chu Essential Commodities bakah Home Department-in a phal bungraw dang phur lirtheite tan hawn a ni anga. Mipui zin veivahna lirthei erawh chu Home Department phalna neite tan lo chuan khap tlat niin Ramri (International leh Inter-State) leh ramri dep khua ah te khauh (strict) taka duty chhunzawm zel a ni ang.
He inkharkhipna kalpui a nih chhung hian mi 5 (panga) aia tam punkhawm khap tlat niin hei hian Inneih inkhawm leh Mitthi vui programme a huam lo thung a, tul bik thilah lo chuan mahni In leh compound chhuahsan phalloh ni zui zelin tlai dar 7:00 leh zing dar 4:00 inkarah pawn chhuah khap a ni zui dawn a. Hei hian COVID-19 chungchanga duty te leh Deputy Commissioner-in phalna a pek te a huam lovang. Loh theih loh thil a nih loh chuan kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te chu mahni Inchhungah inkharkhip tur niin Pawn (mipui/vantlang hmun/puipunna hmun) chhuak tur leh damdawi In-a kal tur reng reng chuan Face Mask emaw, hmanraw dang hmangin emaw hmai an tuam ngei tur a ni a. Vantlang hmun leh dawr-a kalte chu meter 2 (hnih) tal-a inhlata awm tur a nih bakah rampawn atanga lo lut mikhualte tumahin thlen (mikhual) phal a ni lova. Hei hian Home Department emaw, Deputy Commissioner te phalna neite a huam lovang.
Zirna In, Training Institute leh Sakhaw biakna hmunte chu khar chhunzawm zel tur niin an Administrative Office hna pangngai kalpui erawh a huam lo thung a, mipui punkhawmna heng- Inneih lawmna (reception), lungphun, anniversary leh birthday lawmna, Games & Sports, Book Release, Politics leh pawl thila kalkhawmna, intihhlimna ang chi reng reng te chu huaihawt khap tlat niin Inneih inkhawm leh mitthi vuina-ah mi 20 aia tam punkhawm khap zui zel a ni bawk a. Public Park, Picnic Spot, Movie Theatre, Gym, Spa, Beauty Parlour, Community Hall, Bazarpui leh intawllenna hmun zawng zawng chu khar chhunzawm tur a ni.
Dawr, sumdawnna hmun leh eizawnna kawnga hmalakna te chu 'Standard Operating Procedure (SOP) for Social Distancing' zawm chungin kalpui tur niin AMC Area chhung leh District Hqrs. chhung bikah, hmun lunlai/dawr-kawn-a dawr leh Shopping Complex/Mall chhunga dawr inthenawm te chu nikhat kar danah an inhawn chhawk leh tur a ni a, hei hian zirlaibu zawrhna dawr, mihring leh ran damdawi dawr leh clinic-te a huam lo thung a. Tuallai leh kawtthler-a thil zawrh (street vending) khap tlat niin Restaurant hawn phal a ni lova, Home delivery erawh phal a ni anga, Dawr zawng zawng (damdawi dawr tiam lovin) chu tlai dar 5:00-ah khar vek tur a ni.
Sawrkar Pisa kai dan tur chungchang ah Inkharkhip thawh thumna nen danglam lutuk awm lovin Office chhungah phalna la hmasa lovin pawnlam mi kal phal a ni lova. Hemi atan hian Phone-in emaw an hmuh duhte phalna an la phawt tur a ni a. Sawrkar hnathawk zingah hrisel lohna benvawn nei leh naupaite chu Head of Office ten Medical Certificate ngai lovin Commuted Leave an pe thei ang. Mizoram chhunga Central Sawrkar Office, Central PSU, RBI, Bank leh a dangte chu Hqrs. lam atanga kaihhruaina an dawn angin an kal anga. Heng inkaihhruaina hrang hrang zawm lo te hi Dan anga hremna pek theih an nih tur thu sawrkar chuan a puang bawk.

Comments

Chhiar Hlawhte