Chanchin thar thenkhat :

Online in Science Congress

Mizoram Science Congress Organizing Committee chu niminpiah tlai khan Directorate of Science & Technology Conference Room, Aizawl-ah thukhawmin, COVID-19 hrileng avangin Mizoram Science Congress chu Online hmanga neih nise an ti. Mizoram Science Congress Organizing Committee hian Science Congress hi a theih ang anga online-a neih relin, a hmingah ‘Mizoram Science Congress 2020 (Online)’ tih pawm tlangin, a thupui (theme) atan ‘Science as a soul of prosperity and sustenance’ tih thlan a ni a. Mizoram Science Congress 2020 (Online)-ah hian Online International Level Conference-te, zirlai leh Mizo pa tualchher thil siamthiam te pual Online Exhibition-te buatsaih tum a ni a, Science lam zirbingna (research) ti mêkte tân pawha lukhawng nei lehzual turin Online Presentation bakah Congress puala Research Publication bu siam tum a ni bawk.

Police chesual boral
Lawngtlai District chhung Vaseikai khuaa COVID-19 avanga Police Duty, Hav. Rohming-liana (47), Lunglei Luangmual chu nimin zing dar 7:00 vel khan Vaseikai Police Station bul kawng ko-ah tla in nikhaw hrelo in a awm a, Chawngte Damdawi In panpui nghal niin Chawngte thlen-hma KM 10 vela hlan, Jamaisury-ah kawng pingin heta inhlanchhawn an tum lai, chhun dar 12:00 vel khan a hliam tuar lovin a boral zui a ni. Ha. Rohmingliana ruang hi Motor-a lak mai theih a nih loh avangin Lawng hmangin Chawngte-ah lak a ni a, heta tang hian Lunglei-ah a ruang hi lak leh a ni anga, Vawiin lam hian vuiliam tura ruahman a ni.

MNF in Duty te tlawh mek
MNF Party in COVID-19 laka Mizoram a him theihna tura ramri-a Duty te tlawhchhuah runpui an ruahman angin tunkar Thawhtanni atang khan Ministers, MLA leh Party hruaitute an che chhuak tan a, tunkar chhung zawng hetiang hian ramri-a duty te hi tlawhchhuah an ni ang.

MPC Thalai in sawrkar phut
MPC Thalaite chuan tunhnaiah Telengana atanga tangkhangte Mizoram-a phurluttu Driver leh a phurh mi thenkhatte chet fimkhur loh avanga Thingdawl-a chhungkuaa khunghran ngai an awm phah chu pawi an tih thu leh an dem thu thuchhuah siama tarlangin, tunhnuah chuan State dang atanga tangkhangte Mizorama phurlut turin sawrkar thu-nunna hnuaia thawkte chauh Driver atan hmang tawh turin leh, tangkhang hruai hawte pawh anmahni duh thu-a kawng laka remchang zawng lo tura khauh zawka vil turin sawrkar an phut thu an tarlang bawk.

ZPM in theihtawp chhuah
ZPM Thalai President, Malsawmzuala chuan MPC Party mi leh sa tlang hrang hranga awm ten Brig. T Sailo-a'n Mizoram tana hmathlir ropui tak a lo neih te, an damlai ngeia a hlawh-tlinna hmuh an duhna leh beiseina hlenchhuak turin ZPM chuan theihtawp a chhuah zel tih sawiin, “Pu Thena'n December ni 7, 2013-a Brig. T Sailo Foundation hawnnaa a thusawi ah ram hruaitute chu ram hmasawnna atchilh tura thu a chah chu kan ram hruaituten hre nawn leh se ZPM Thalai chuan kan duh,” tiin MPC te chu an unaute an nih thu a sawi bawk.

SSU dincham vawi 35-na
Zirlai mahni-a inchawm, Students’ Self-Support Union (SSU) chuan nimin, May 27, 2020-a an dinchampha vawi 35-na puala thuchhuah siamin Mizoram hmun hrang hranga SSU member te leh zirlai mahni intodelh kawnga hma la mekte chibai an buk a. SSU chuan an din tirh atangin an thiltum, 'Zirna atana mahni intodelh' leh 'Kut hnathawh chawisan' kawngah chak takin hma a la chhunzawm reng tih sawiin, Mizoram hmun hrang hranga SSU Member te chu an tum leh dinchhan te hre reng a, an awm hmun theuhah theihtawp lo chhuah zel turin an ngen bawk.

Comments

Chhiar Hlawhte