Sawrkar Inrenchemna turah chanchinbu te eibel nghawng thei zawnga ruahmanna MJA in tha an ti lo

Mizoram Journalists’ Association (MJA) General Headquarters hruaitute chuan sawrkar sum inrenchemna tura ruahmanna siam zingah Mizoram-a chanchinbute eibel nghawng thei zawnga ruahmanna awm tel chu paihsak leh turin nimin khan Chief Minister, Zoramthanga hnenah ngenna an thlen.

MJA General Hqrs. hruaitute hian nimin khan Chief Minister, Zoramthanga hi a Pisa-ah kawmin Coronavirus hrileng vangin khawvel, India leh Mizoram sawkar buai dan leh harsatna an hriatpui thu te, kan state sawrkar pawhin a tira sum ruahmannaa tel lo cheng vaibelchhe tam tak a hmang tih an hriat thu te, sawrkar sum harsatna pawh an hriatthiampui em em thu te sawiin, Mizoram sawrkarin a din Committee of Economy Measures-in sum renchemna atana rawtna an neihte a tlangpui thu-a an thlawp laiin, he Committee rawtna zingah Online Advertising leh Publicity lam kalpui uar tura rawtna awm tel chu chanchinbute tan chuan an eizawnna tawp phah theihna a nih avangin paihsak leh turin an ngen a ni.
MJA General Hqrs. hruaitute chuan Mizoram sawrkar Annual Budget-ah Department hrang hrang ten kum khat chhunga ‘Advertising & Publicity’ atana sum an dah chu Budget pumpui atanga chhutin, zaa paisa 10 (naia 10) aiin a sang ngai lo tih sawiin, kum 2020-2021 Mizoram State Budget (Demands for Grants)-a a lan danin, kum kal mekah hian Advertising & Publicity atana Department 32 ten sum an dah belhkhawm chu cheng nuai 214.23 a nih thu leh hei hi Budget pumpui atanga chhutin zaa paisa 2 (naia 2) vel a ni tih an sawi a. Mizoram puma nitin chanchinbu awm zawng zawngte tana kum khat chhunga Classified Advertisement pekchhuah zawng zawng hi a inzatin insem dawn se, kum khat chhunga chanchinbu pakhatin a hmuh zat chu cheng nuai khat pawh tling phalo a nih thu te an thlen bawk.
MJA hruaitute chuan Chanchinbu chu a lak man (subscribtion fee) atang ringawt chuan a intodelh phak loh thu te, Mizoram chauh ni lo, National Paper te pawh Advertisement tel lova dam khawchhuak thei lo ve tho an nih thu te pawh Chief Minister hnenah hian thlenin, kumtin-a sawrkarin Advertising & Publicity atana sum beitham tak a dah chu chanchinbuten nunna hnar atan an hman ve thin a nih rualin, sawrkarin mipui hnena hriattir a duh te chanchinbu kaltlanga a hriattirna a ni tel tih tih an sawi a. Tuna sawrkar sum renchemna atana rawtna, Online Advertising leh Publicity lam kalpui uar tura tih chu kal-tlangpui a nih chuan, chanchinbuten sawrkar atangin Advertisement an hmu thei dawn lova, Advertisement tel lo chuan rei tak an dam thei dawn lo bawk tih sawiin, hei vang hian sawrkar sum renchemna kalpui chhoh turah he rawtna hi hmang lo tur leh paihsak turin Chief Minister hnenah hian ngenna an tlhen a ni.
Chief Minister chuan MJA hruaitute hnenah hian sawrkar inrenchemna tura rawtna ah chanchinbu te intunnun ve na hrek tel theihna awm chu inrenchemna atan sum tam tham a kal phah a rin chuan loh thu sawiin, an thu thlen hi a lo enzui tur thu leh sawrkar hotu dangte a lo sawipui tur bakah siamthat harsa a nih a rin loh thu te a lo hrilh bawk a ni.

Comments

Chhiar Hlawhte