Task Force Duty te puibawm turin Zirtirtute ngen

Mizoram sawrkar-a School Education Department chuan an Department hnuaia thawk Zirtirtu zawng zawngte chu mahni awmna Khua leh Veng theuhah he hrileng dona kawnga theihtawp lo chhuaha, Task Force Duty te lo puibawm-a a tul apiang thawk turin a ngen.
Hemi chungchanga nimin-a thuchhuah an siamah School Education Department-a Director, K. Lalrinzuali chuan hun engemaw chen chu COVID-19 hri leng avangin nunphung a khaihlak ta tih tarlangin, he hri leng laka invenna atana sawrkar hmalakna te bawhzuina kawngah Village Level Task Force (VLTF)/Local Level Task Force te an hah rei ta hle tih a tarlang a. Lockdown thlahdul hret hret a nih angin Local Task Force Member engemaw zat chu mahni eizawnna lama an kal a lo ngaih ve zel bawk avangin tun dinhmunah Task Force duty-te an indaih lo hle tih a tarlang.
Hei bakah hian State pawna Mizoram mi tangkhang mi thahnem tham tak lo haw tur an awm avang leh Quarantine Centre-ah awmtir phawt an ngaih avangin heng Quarantine Centre-a duty tur hian Local Task Force te an indaihlo lehzual hle tih pawh sawrkar thuchhuah chuan tarlangin, chumi indaihlohna sukiang tur chuan School Education Department hnuaia thawk zirtirtu zawng zawngte, COVID-19 dona kawnga Official Duty dang la pekloh zawng zawngte chu mahni awmna Khua leh Veng theuhah he hrileng dona kawnga theihtawp lo chhuah a, Task Force duty to lo puibawm-a a tul apiang thawk tura ngen leh hriattir an nih thu a tarlang a ni.

Comments

Chhiar Hlawhte