Inkharkhip avanga ramchhung leh pawn-a tangkhang te sawrkar in a buaipui zel

Chief Secretary, Lalnunmawia Chuaungo chuan State danga Mizo tangkhang, Mizoram-a lo haw duh harsatna tawk te chu an haw man sawrkarin a tumsak dawn tih sawiin, hetihrual hian mahni intum thei te chu anmahni an intum dawn tih a sawi a. Tunah hian ramchhungah mi singkhat chuang leh rampawn ah mi 600 chuang an tangkhang mek nia chhinchhiah a ni.

Rampum-a inkharkhip kalpui mek a nih avanga India ramchhung hmun hrang hranga tangkhang awm mek te chungchangah Chief Secretary, Lalnunmawia Chuaungo chuan he thu hi sawiin, tangkhang hruai haw te hi an lo thlen veleh khunghran nghal an nih tur thu a sawi a, tunah hian mi sing khat chuang lo la haw lo an awm thu leh mi 6000 vel awmna tur chauh hmuh theih anih avangin Kohhran hrang hrang te chu an Kohhran Hall hman dil anih thu leh lo haw hmasa te dahna hnuah lo haw hnuhnung te dah a tul leh thu te a sawi bawk.
Hetihlai hian Task Group on Migrant Workers & Travellers-a State Nodal Officer, P. Jawahar chuan State páwna Mizo tangkhang, Mizoram-a haw duh an hnena inhriattir chu mi 10,750 vel an ni tawh tih sawiin, “Haw duh zat hi a danglam reng a, inhriattir tawh hnua haw duh leh lo te an awm thin. Tangkhangte hruai haw tur hian hmalak mek a ni,” a ti a. Tunah hian Karna-taka, Delhi leh Hyderabad-a tangkhangte hruai haw tura hmalak mek a nih thu sawiin, “Sawrkar pawmpuina kan ngaichâng mek. Ruahman dan chuan, Karnataka-a tangkhangte hruai haw tum hmasak ber an ni,” a ti a; Delhi leh Hyderabad-a awmte hruai hmasak zawk turah thu chiang a la awm loh thu a sawi bawk.
Hetihlai hian India ram pawn lamah pawh Mizo tangkhang hi mi 603 an awm mek niin Task Group on Migrant Workers and Stranded Travellers chuan an chhinchhiah bawk a, ram-pawn a tangkhang zingah hian Myanmar-a tang-khang tam berin mi 308 an awm a. Rampawn a tangkhang chhinchhiah tawh zinga mi 211 chu Lawng-a tang an ni a, anni hi Lawng a thawk niin, a bak 392 chu ramdang hmun hrang hrang a tangkhang mek an ni thung.

Comments

Chhiar Hlawhte