Mipui thlamuan tu tur CM kan mamawh - ZPM

ZPM General Hqrs. chuan mipui thlamuantu tur Chief Minister kan mamawh niin an sawi.

Nimin a thuchhuah an siamah ZPM General Hqrs. chuan khawvel pumah COVID-19 hri leng vangin mipui leh sawrkar a buai em em a, ram hrang hrangah leh India chhunga state hrang hrang sawrkar hruaitute pawh an theih ang anga an buai laiin Mizoram Chief Minister erawh chu mipui thlamuan tur a nih laiin Lengpui Airport-ah a kal tluk tluk chu awmlo an tih thu sawiin, mipui thlamuan turin penchhuak turin an ngen a. ZPM thuchhuah chuan ramri-ah mi tlawmngai thahnem tak ten chhun leh zan sawi lova duty-in hun an hmang mek tih sawiin, mi tlawmngai leh MLA thenkhatte chuan tlawhin eitur leh an mamawh eng eng emaw an pek laiin kan Chief Minister berin mipui leh ram tana ramri-a duty te ala tlawh ve miah lo leh hmun hahdamah chauh hun a la hmang chu hruaitu nih a tlinloh zia lang chiang hle niin an sawi a. Lengte ah ram zau tak neiin Mau chi a kui mek tih chu vantlang hriat a ni tih pawh tarlangin, “He a huan tlawh thup nan Lengpui Airport a tlawh thin nge, hetianga ram mipui zawng zawng kan mangan laia Lengpui Airport siamthat a tlawh tlut tlut mai hi a thawktu Engineer te a ring zo lo em ni tih hi mipuiin hriat an chak hle a ni,” an ti bawk.