Madhya Pradesh, Gujarat leh Karnataka-a Mizoram mi tangkhang ten Mizoram an rawn thleng

Rampum-a inkharkhip kalpui mek avanga Mizoram mi leh sa hruaihaw hna thawh mekah Karnataka-a Mizoram mi leh sa tangkhang, Shramik Train hmanga lo haw mi 1452 te chuan nimin zing khan Bairabi Rel chawlhhmun an lo thleng a, Madhya Pradesh leh Gujarat atanga lo chhuakte pawhin nimin chhun dar 12:50 khan Bairabi hi an rawn thleng bawk.

Karnataka bakah Madhya Pradesh leh Gujarat atanga rawn haw te hi niminpiah khan Mizoram rawn thleng tura beisei ni mah se kawng lakah ruahsur avanga chhiatna hrang hrang thleng avangin a hun takah an rawn thleng thei lova, a rawn thleng hmasa zawk Karnataka State atanga rawn haw te hian nimin zing dar 4:30 khan Bairabi hi rawn thlengin Kolasib DC, Dr. H. Lalthlangliana leh SP, Vanlalfaka Ralte bakah tangkhang te dawnsawnna kawnga mawhphurna hrang hrang nei ten an lo hmuak a, heng mite hi Bairabi an lo thlen rual hian Rel chhungah ei leh in pek an ni a, Screening Point 10 kaltlang a endik vek an nih hnuah an District theuh chu Bus 124 hmangin pan tir leh an ni.

Karnataka atanga rawn haw te hi an vaiin mi 1452 an ni a. Aizawl District mi 476, Lunglei District mi 279, Serchhip District mi 50, Kolasib District mi 51, Champhai District mi 90, Siaha District mi 134, Mamit District mi 128, Lawngtlai District mi 178, Saitual District mi 30, Khawzawl District mi 24 leh Hnathial District mi 12 an ni a, an zingah hian insawisel pakhat awmin a chhuanpui, an Compartment ami zawng chu motor hran-ah phurin a hrana Quarantine tura lak nghal an ni a, he Compartment-ah hian Kolasib District mi 5, Aizawl District mi 55, Lunglei District mi 16 leh Saitual pakhat te awmin Kolasib District ami zawng hi an District-ah khunghran an ni anga, a bak zawng hi Aizawl District-ah khunghran an ni anga, insawiselna nei hi ZMC-ah Test tura lak nghal a ni a. Mamit District mi 7 te pawh an zin kualna chhui an nih hnuah COVID-19 vei tamna hmuna zin an nih avangin ZMC-ah lak an ni bawk nia thudawn a ni.

Karnataka atanga lo haw te phurtu Rel-in Bairabi Rel chawlhhmun a chhuahsan hnu hian Gujarat leh Madhya Pradesh atanga lo hawte phurtu Rel chuan nimin chhun dar 12:50 khan Bairabi Rel chawlhhmun hi a rawn thleng veleh a, an lo thlen rual hian Rel chhungah ei leh in pek niin Screening Point 10-ah endik nghal an ni a, Gujarat atanga lo haw te hi mi 289 leh Madhya Pradesh atanga lo haw te hi mi 223 niin an rawn chhuah dawnah chhinchhiah an ni a, Bairabi Rel Station-ah chhiar nawn leh niin hemi hnu hian anmahni District theuh panpui leh nghal an ni.

Kolasib District thuneitute ruahmanna in District hrang hrang ami te hi Liason Officer ruat bik theuh ten an lo buaipui a, kawng laka harsatna a awmloh nan Escort te nen Kolasib District ramri chin thleng an thlah vek bawk.