Chanchin thar thenkhat :

Mizo siam Face Mask

COVID-19 laka invenna hmanrua pakhat, 'Face Mask' chu rampumah indaihlohna a nasat avangin Mizoram sawrkar-a Commerce & Industry Department hmalakna in Face Mask chi hnih - Woven Fabric leh Non-Woven Fabric te siam a ni a. Heng te hi WHO leh MoH&FW approved specification ang thlapa siam an ni tih Controlling and Licensing Authority te chuan mipuite a hriattir a. Mizoram chhunga damdawi zuar zawng zawngte chu phai lam atanga 'Face Mask' chah rih lova, Mizoram chhunga siam-chhuah ngei chauh zuar tawh tura ngen leh hriattir an ni a. Director, Commerce & Industry Department-ah engtik lai pawha lei theihin a awm reng a ni. He ngenna leh hriattirna hian Face Mask lakluh leh hralh chungchanga thu leh awm hma zawng a huam ang.

Minister in VLTF te tlawh

Information & Public Relations Minister, Lalruatkima chuan nimin khan Lawngtlai District chhimchhak lama Myanmar ramri bul khua Zochachhuah leh Hmawngbuchhuah tlawhin, COVID-19 laka Mizoram a him nana ramri-a ral veng, Village Level Task Force (VLTF)-te nen inkawmhona hun an hmang a. AH&Vety Minister, Dr. K. Beichhua pawhin nimin vek khan Mamit District tlawhin Mamit bakah West Phaileng, Suarhliap, Saikhawthlir leh Chuhvel khua te tlawhin, VLTF Duty te a kawm bakah an mamawh Hand Sanitizer, Face Mask bakah Silpauline a hlan nghal bawk.

Central YMA in chah

Central YMA chuan thuchhuah siamin kan hma lawk, June 15, 2020 chu YMA Day vawi 85-na a lo ni leh ta tih tarlangin, khawvel ram hrang hrangah hripui leng (COVID-19) vangin kumin YMA Day chu kum danga an hman angin a hman theih dawn loh nia a lan thu an tarlang a. Hei vang hian YMA Flag a tam thei ang zar tur leh tanpui ngaite tanpuia, YMA In leh building te tuaithar turin Group leh Branch te an chah bawk.

Zirchianna sawrkar-ah thehlut

Mizoram sawrkar-a Planning & Programme Implementation Department in COVID-19 hripui leng avanga inkharkhipna kalpuiin kawng hrang hranga Mizoram sum leh pai dinhmun a nghawng dan zirchianna ‘Covid-19 Lockdown and its Economic Consequences for the State of Mizoram (Policy Response - Recommendation & Advisory’ chu tunhnai khan sawrkar-ah an thehlut.

PWD Minister ban an phut

PRISM Party Thalaite chuan niminpiah zing-a Mamit District chhung, Dârlâk khaw bul Teirei lui-a Lei dawh mêk chim chungchanga sawrkâr insawifiahna chu Zoram mipuiten thu tlingah an pawmlo nia sawiin, PWD Minister Zoramthanga chu bâng tùra an phùt thu an sawi a. Zoram mipuite hian Lei dawh chim chu an kham tawh niin an sawi bawk.