COVID-19 hrileng kaihhnawiha Press mite zalenna rahbeh tumna MJA in an duhlo

Mizoram Journalists' Association (MJA) chuan COVID-19 hrileng kaihhnawiha Press mite zalenna India sawrkarin a pek rahbeh tumna awm chu a duhloh thu leh tha a tih loh thu Mizoram Chief Secretary hnenah a thlen.

Lunglei Deputy Commissioner lehkha (Memo No. C.15016/1/2019/DCL(IC) dated Lunglei, the 11th May, 2020) a tarlan angin May 5, 2020 khan DC Lunglei kaihhruaiin 60 Battalion BSF, 131 Battalion BSF, Sub-Hqrs YMA Lunglei leh SP Lunglei te chuan COVID-19 laka Mizoram himna atana Indo-Bangla Border a duty chungchangah Joint Meeting an nei a. Chuta an thurel No. 5 ah chuan, "YMA hruaituten an member, ramri hrula duty-te an tlawh duh a nih chuan a huamchhunga BSF Commandants an hrilh hre hmasa tur a ni a, hemi ang hian ruahmanna siam zui a ni ang" tih a nih laiin, an thurel No.6 ah chuan, "Media miten ramri hrul an tlawh duh a nih chuan a huamchhung BSF Commandants hnen atangin phalna an la hmasa phawt tur a ni ang" tih a ni thung tih an sawi a. Hetianga anmahni aiawh tel hauh lova Media mite zalenna rahbehsakna thu pass a nih ang ngei hian, May 12, 2020 a Lunglei District MJA member ten Press Accreditation Card awrh chunga Tiperraghat bula YMA Tlabung Chawnpui Branch duty te tlawha thilpek hlan an tum chu BSF duty ten an lo dan avangin a hlawhtling thei ta lo niin an sawi bawk.

Lunglei DC kaihhruai Meeting-in Media aiawh tumah tel lova Media mite chungchang an lo rel leh Freedom of the Press rahbehna thu an lo pass ve ngawt chu MJA Gen. Hqrs. chuan mak an tih thu leh, democracy rama hetianga Freedom of the Press rahbeh a ni hi pawi an tiin an dem takzet tih an sawi a. “Democracy ramah chuan transparency a awm tur a ni a, ramri vengtu BSF te pawh hian engtiklai pawhin an hnathawh te Media miten an hmuhpui hi an ngam turah MJA chuan a ngai a ni,” an ti a. COVID-19 dona kawngah sawrkar laipui-a Ministry of Information & Broadcasting chuan March 23, 2020-a state sawrkar leh Union Territory tin Chief Secretary te lehkha a thawn (vide No. E-36011/8/2020-BP&L) ah, awareness atan leh chanchin thar dik leh rintlak mipuiten an hriat theihna turin media miten zalen taka hna an thawh a, an duhna hmuna an kal a, an mamawh ang hmanrua an neih theihna atan a tul anga hma lo lakpui turin a ti zawk tih pawh sawiin, hetiang harsatna hi Lunglei District leh Mizoram hmundangah a thlen tawh loh nan leh Lunglei DC hova thurel 6-na hi paiha siamthat a nih theihna atana hma lak sak tur leh Indo-Bangla Border area khawilai pawh media miten tlawh an duh huna BSF ten an lo dan buai tawh loh nana hma laksak turin Chief Secretary hi an ngen a. Chief Secretary chuan tihsual palh awm chu siamthat a nih tur thu lo hrilhin, hetiang thil hi a thlen nawn leh tawh lohna turin a lo bawhzui tur thu a lo hrilh bawk a ni.