Chanchin thar thenkhat :

Mahni thu-a haw remlo

Mizoram sawrkar chuan thuchhuah siamin Mizoram mi leh sa, rampawn-a tangkhang mek, Mizoram-a rawn haw tum te chu mahni thu a rawn haw ngawt lo tura ngen leh hriattir nawn an ni a. Sawrkar laipui-a Home Ministry thuchhuah angin mahni State-a haw duh an awmin State Sawrkar pahnih (thawn haw tur State leh lo dawng tur State) te inbiakremna a ngai a. Mizo-ram Sawrkar chuan rawn haw turte tan hian an in Quarantine dan tur a ruahman fel hmasak a ngai a, hei bakah hian an hriselna enzui dan tur protocol Sawrkar-in a siam ang te zawm vek a ngai a. Hei bakah hian State pawn atanga rawn haw turte tan hian kalphung (SOP) mumal taka duan a nih avangin Sawrkar-in phalna a pek tih loh chu rawn haw hmanhmawh rih lo turin leh Mizoram Sawrkar phalna lo ngaichang tura hriattir nawn an ni. Hei bakah hian lo kir turte hian intiamkamna (SOP-a format awmsa angin) an sign a ngai bawk a, hei hi an lo kir hma pawha tihfel theih a ni thung.

TATA-TRUST NEIDA in hlan

Mizoram sawrkarin COVID-19 dona tura hma a lakna kal zelah Inrinni khan TATA TRUSTS - NEIDA (North East Initiative Development Agency) hnen atangin Hand Sanitizer litre 2,200 chu Chief Minister, Zoramthanga chuan a dawng a. Hei bakah hian New Delhi Mizoram House-ah TATA TRUSTS - NEIDA atang hian PPE Full Body Suit 2,000, Face Mask 22,000 leh Gloves 10,000 lo hmuh a ni tawh a. Heng bakah hian Ventilator leh bungraw mamawh dang beisei mek a ni bawk. Heng bungrua te hi Health & Family Welfare Department Office ah dah nghal a ni.

Hmar Martyrs' Day hmang

Inrinni khan ramchhung hmundangte rualin Sinlung Hills Council (SHC) huamchhung leh Mizoram hmun hrang hrangah Hmar Martyrs' Day vawi 30-na chu urhsun taka hman a ni a, Martyrs’ day hi Hmar hnam tana nunna lo chan tawh te zawng zawng hriatrengna’n a hman thin a ni.

Sports Minister in hmunhma siamna tur a enfiah

Sports Minister, Robert Romawia Royte chuan Inrinni zing khan Aizawl Bethlehem Veng leh Assam Rifle ram inrina laia Basketball Court siam a rem leh rem loh Assam Rifles hotute nen an en a, Bethlehem Veng chhungah Infiamna hmunhma a awm loh avangin helai ramri lai vel hi khawtlang tana hman tangkai a tul thu a sawi bawk. Hemi hnuah hian a bial chhung Aizawl East-II a Chite Veng Football Ground zauh dan tur leh phullem phah dan tur enfiahin, Armed Veng-a1st Bn MAP Ground zauh dan turte leh phullem phah dan tur bakah Chhinga Venga Govt KVM kawt-zawla Basketball Court siam dan tur pawh a en pah nghal bawk.

Ramri-ah Police dah belh

Inrinni khan Vairengte Police Station leh Saiphai Border Out Post-ah te Mizoram Police ralthuam keng thahnem tham tak dah belh a ni a, heng Police dah belh te hian ramri a duty mek te a tul angin an chhawk ang. Kolasib District MJA member te chuan Inrinni khan Kolasib District chhunga Mizoram leh Assam ramri a Local Task Force inkulhna hmun hrang hrang an tlawh a - Vairengte, Phainuam, Saihapui V, Phaisen, Buhchangphai, Bukvannei, Pangbalkawn leh Meidum bakah Bairabi North leh South Task Force Committee hruaitute kawmin, an hmalakna te an enpui a. Village Task Force hrang hrangte an hmalakna an tarlan zingah Saihapui V Task Force te chuan Assam nen a an inkalpawhna kawngpui paltlanga an khua a cheng mipui nitin mamawh ramri ah darkar 26 chhung khawih chet loha an dah hran phawt thu an sawi a, hei hi COVID-19 natna hrileng laka himna atan tula an rin thu MJA member te hi an lo hrilh a ni.

Media zalenna rahbehna nia hriat thu sawi

MJA Lunglei District chuan tunhnaia Lunglei District Bawrhsap hova inkhawm thuchhuak chu Media mite zalenna rahbehna nia an hriat chungchangah MJA General Headquarters chu a tul anga hmalak pui turin an ngen. Inrinni-a MJA Lunglei District hruaitute thukhawm chuan tun thla ni 11-a Lunglei Bawrhsap kaihhruaina hnuaia BSF, YMA Sub-Hqrs. Lunglei leh Police aiawh thukhawm in ramri ven chungchanga an thuchhuak 6-na a Media mi, ramri tlawh duh te chuan BSF Commandant te phalna lak hmasak ngai tura thu an titlu chu media mite zalenna rahbehna a nih thu sawiin, he thu sut leh tur hian MJA General Headquarters-ah a tul anga hma la turin ngenna an thehlut a ni. MJA Meeting chuan Media mite chu an inhuamna leh inpekna a zira indona hmun ah emaw, silai mu karah pawh kal thei tur an nih lai a hetianga an zalenna rahbehsak an ni chu an hriatthiam loh thu an sawi a ni.