Petrol leh Diesel-a Chhiah lak tihsan a ni dawn

COVID-19 hripui leng avanga sum harsatna tihziawm nan Mizoram-ah Petrol leh Diesel-a Chhiah lak tihpun a ni dawn.

Taxation Minister Lalchamliana chuan COVID-19 hripui leng avangin State Sawrkar a Chhiah lut tur nasa taka a tlakhniam thu leh hri leng dona atana sum leh pai thahnem tak mamawh a nih bawk si avangin Sawrkar inrelbawlna atana pawimawh ber pakhat Chhiah lak tihpun chu Cabinet in a rel tih a sawi a. Zirtawpni-a Council of Ministers thukhawm chuan ngun taka a ngaihtuah hnuah tuialhthei chi hnih - Diesel leh Petrol atanga sawrkarin Value Added Tax (VAT) a lak chu tihpun a rel tih a sawi a. Diesel a VAT lak za zela 12 atangin za zela 14.5 ah tihpun tur a ni dawn a, Petrol chu za zela 20 lak thin atangin za zela 25-ah tih san a nih tur thu Minister chuan a sawi a. Hei hi June ni 1 atanga hman tan tura tih a ni. Hemi chungchang ah hian Minister chuan, “Oil man tihsan anih avang hian bungraw phur lirthei leh passenger phur lirthei te chu an phurh man tisang lo turin kan ngen a ni,” a ti bawk.

India ramah COVID vanga lockdown kalpui anih avangin sawr-kar sum hmuh leh Central atanga dawn thin chu nasa takin a tlahniam a, Mizoram pawhin March thlaa GST atanga sum a hmuh cheng vbc. 18 chu April-ah chuan vbc. 14 ah a tlahniam a. Taxation Minister hian State sawrkar thuneihna-ah VAT hnuaiah Zu leh tuialhthei leh a behbawm ah Chiah chhiah lak a ni tih sawiin, Mizoram State chu Zu khapna a nih angin Zu Chhiah lak a nih loh thu a sawi a. Tuialhthei leh a behbawma Chhiah lak zat tur hi State Sawrkar tih danglam theih a nih thu a sawi a. State dangah chuan VAT bakah Surcharge te, Cess chi hrang hrang te an la niin a sawi bawk

Taxation Minister sawi dan chuan, Inrinni khan Diesel man hi litre khat Rs. 60.49 a ni a, Chhiah tihsan a nih hnu chuan litre khat Rs. 62/- a ni dawn a. Petrol pawh tunah litre khat Rs. 66.54 a ni a, Chhiah tihsan a nih chuan litre khat Rs. 69.87 a ni ang. Hei hi State dang nena khaikhin-a VAT tihpun hnu pawhin Arunachal Pradesh tih lovah chuan a rate hi a hniam ber dawttu te zing a mi la ni tho tih Home Minister chuan a sawi a. Chhiah tihpun atang hian kum khatah Vbc. 9.4 hmuh belh theih an beisei thu a sawi bawk.