Serchhip Tuikhuah Veng-a NH. 53 tlahniam thin venna tur hnathawh mek enfiah a ni

Serchhip Tuikhuah Veng-a NH. 54 kawngpui tlahniam thin venna atana hnathawh mek chu nimin zing khan Serchhip Sub-Hqrs. YMA Vigilance & Monitoring Committee chuan enfiahin helai hmuna hnathawh te chu a tha thei ang ber thawh tum turin an ngen nghal bawk.

Serchhip Tuikhuah Veng-a NH. 54 kawngchhuat tlahniam thin venna tura hnathawh mek thenkhat chu enfiah ngai nia thu an dawn bawhzuiin Serchhip Sub-Hqrs. YMA Vigilance & Monitiring Committee te hian Sub-Hqrs. YMA President, R. Sanghmingthanga hovin an hmunah an enfiah a, he hnathawh vil mektu PWD Serchhip Division-a SDO, Lalduhzuala leh Contractor ten lo dawngsawngin hnathawh mek hi an fangkual a. A tira ruahman ang lo deuha hna thawh awm chungchangah PWD hotute chuan hnathawh thenkhat chu a hmun hma leh leilung-in a zir loh avanga tih danglam a ntul thu leh, an tihdanglam hlek avang hian sum leh pai-ah a heu phah loh thu sawiin, a tira Estimate a tello leh thil tul tak ni si, Retaining wall te an siam belh thung avangin a Estimate chu a ngai reng tih an sawi bawk.

Serchhip Tuikhuah Veng-a kumtin deuhthaw a Lei tlahniam thin venna tur hian kum 2017 khan DM&R lamin DPR an siam chu kum 2020-ah Work Order hmuh a ni a, DPR hi PWD ten an ennawn leh hnuah lei tlahniam thin ven nan hian kawr dung-ah Basewall 4 leh Check Dam 1, Link Drain, Retaining Wall leh Culvert te siam niin Estimate amount hi cheng vbc. 1.39 a ni a, tunah hian hna tam zawk chu thawh zawh a ni tawh a ni.

Nimin zing-a he hnathawh an enna ah hian Serchhip Sub-Hqrs. YMA President, R. Sanghmingthanga chuan helai hmun hi kumtin deuhthaw-a che thin leh harsatna thlen thin a nih avangin Contractor leh Department lam pawh theihtawpa tha a thawk turin an ngen a, PWD leh YMA ten Agreement an ziah in a phut angin hnathawhna hmunah hian Information Board tar a tul thu sawiin, hmasawnna hnathawh an endik thin chu Party leh Contractor tih bik an neih vang ni lovin, hmasawnna hna tha taka thawh an duh vang a nih thu a sawi bawk.

He huna kal PWD hotute chuan theih-tawp chhuaha tha taka an hna chu thawh an tum thu sawiin, Information Board pawh tar tura an siam tir mek thu an sawi a ni.