Serchhip-ah Inkhunghranna atana Kohhran Hall leh hmunhma hman dan tur sawihona neih a ni

Nimin khan Serchhip District Bawrhsap, Dr. Lalzirmawia Chhangte hovin Serchhip khaw chhunga Kohhran hrang hrang aiawhten State pawn atanga lo haw turte inkhunghranna tur hmun chungchang an sawiho a. Kohhran thenkhat chuan an hmunhma hman bakah ei leh in tumsak thlenga an inhuam thu an sawi bawk.

He sawihona hun Serchhip DC Meeting Hall-a neih ah hian District Bawrhsap Dr. Lalzirmawia Chhangte chuan Kohhran hote chu sawrkar hmalakna tichaktu leh tiphurtu an ni tih sawiin, tunlai hrileng chungchanga kan inkaihhruaina leh inenkawl dante hi a tlachawpa ngaihtuah a nih fo avangin felhleh deuhte pawh thil awm thei a nih thu leh chuti chung chuan Kohhran hoten sawrkar thu zawma, tha taka sawrkar an thawhpui tlat avangin thlamuan thlak a tih thu a sawi a. Chhiatni thatni chungchangah pawh kan Hnam tihdan leh Sakhaw tih dan te avanga hmalak a harsat chang awm thin mahse, mipui tlem thei ang ber pungkhawm thin tura hma la chhunzawm zel turin a ngen bawk.
Nimin-a inkawmhona ah hian Serchhip khaw chhunga Presbyterian Kohhran 6 leh Mizoram Baptist Kohhran (BCM) pathum aiawhte an tel a. Mizoram pawn hmun hrang hranga kan District mi tangkhang mek mi 407 in report tawhte an lo haw huna dahhranna tur atana Kohhran Hall leh hmunhma te hman tangkai theih a nih leh nih loh ngaihtuah ho niin Kohhran aiawh kalkhawmte hian an hmunhma te chu sawrkarin a mamawh anih chuan hman a remchan thu an sawi hlawm a, Kohhran thenkhat aiawhte phei chuan an hmunhma te hman anih chuan chuta khunghran te ei leh in leh senso leh thil tul dangte thleng pawha tum an inhuam thu Bawrhsap hi an hrilh a ni. Hetianga Kohhran hrang hrang aiawhte inpekna avangin hian Bawrhsap chuan lawmthu a sawi a, Kohhran hmun hmate pawh a tul anga enfiah anih nghal tur thu a sawi bawk.
Tun thlenga sawrkarin inkhunghranna tura a ruahman sa ah hian mi 488 dawl zo tura beisei niin, tunah hian mi 53 khunghran an awm mek a, Inkhunghranna hmun pakhatah hian hmun hran leh hun hranga lo haw te dahkhawm a rem-chan loh avangin inkhunghranna hmun tur hi a remchan anga ngaihtuah belh zel a ngai a ni. He inkawmhona ah hian Addl. DC, HD. Lalpekmawia leh SDO (Sadar), C. Lalduhzuali bakah Denny Lalchhuanmawia, SDC te pawh an tel a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn