Serchhip District chhunga Lei dawh mek te YMA hruaitu ten a hmunah an enfiah

Serchhip Sub-Hqrs. YMA Vigilance & Monitoring Committee chuan nimin (May 25, 2020) khan Keitum leh Khawlailung inkar-a Tuichang Lei dawh mek leh Serchhip leh Thenzawl inkar-a Mat Lei dawh mek te chu a hmunah kalin hnathawh dan an enfiah.
Nimin-a heng Lei dawh mek en-a kal Serchhip Sub-Hqrs. YMA Vigilance & Monitoring Committee hi Serchhip Sub-Hqrs. YMA President, R. Sanghmingthanga chuan hovin PWD Serchhip Division-a SDO, Lalduhzuala leh Contractor ten an lo dawngsawng a, heng Lei pahnih dawh mek te hi a hmunah enin hnathawh dan hrang hrangte chu SDO leh Contractor te hian an hrilhfiah a ni. Keitum leh Khawlailung inkar Tuichang Lei dawh mek hi M/S Sad Guru Construction Pvt. Ltd. ten thawk mekin Double lane tur niin 7.5mtrs a zau leh 68mtrs a thui niin Tons 70 dawl zo tur a ruahman a ni a, Project Cost hi cheng vbc. 8.25 niin kum 2016 December thla khan thawh tan a ni a, a tirah RCC tura ruahman ni mah se Lei ban phunna turah harsatna a awm avangin Built-Up Steel Girder Bridge (Single Span) in dawh tura tih a ni leh ta zawk a, nikum November thla khan hna hi tan leh niin kumin March thla khan zawhfel tura ruahman a ni a, tunah hian Lei innghahna tur (foundation) siam hna chu zo tawhin hei hi hna pumpui atangin 60% vel a ni. Lei dawh tur Super Structure chu Guwahati-ah siam mek niin COVID-19 hrileng vangin Mizoram-ah phurh thlen theih a la ni lo a, heng bungrua te hi phurh thlen theih a nih chuan Fur avanga tui lian kam hnu thla thum (3) ah zawh hman beisei a ni tih Lei dawh hna thawktute chuan an sawi a ni.
Thenzawl leh Serchhip inkar Mat lui-a Lei dawh hna hi Tantia Company in an thawk thung a, hnathawh zawh hun tur hi June, 2020 nimahse COVID-19 hrileng vangin labour leh bungraw phurh lamah harsatna a awm tak avangin May, 2021-ah zawh hman beisei chauh a ni a. He Lei hi 63mtrs a sei, 70 Tons zo tura ruahman niin he Lei hi Serchhip to Buarpui inkar kawng, ADB Road Project hnuaia awm niin kawng siam hna leh Tlawng-a Lei dawh hna te nen a vaiin cheng vbc. 230 senna tur a ni a, tunlai a an harsatna ber chu duh anga tam Diesel an hmu theilo chu a nih thu BL. Ajit Sarya, Project Coordinator, Tantia Costruction Ltd. chuan a sawi bawk.
Serchhip Sub-Hqrs. YMA hruaitute chuan Tuichang leh Mat Lei te chu Serchhip District chhunga ei leh bar lakluhna kawng pawimawh tak a nih avangin uluk leh chak taka hna thawk turin hnathawktute chu an ngen a, harsatna an tawh palh thu ah YMA tih theih a awm a nih chuan theihtawp chhuahpui an in huam thu an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn