MNF in CM leh Finance Minister thlak tul an ti lo

Mizo National Front (MNF) chuan Chief Minister leh Finance Minister thlak tul an ti lo tih an sawi.

Nimin a thuchhuah an siamah MNF General Hqrs. chuan tunhnaiah Political Party thenkhatten a chhan chi hrang hrang avangin Finance Minister leh Chief Minister thlak turin MNF Party nasa takin an bei tih sawiin, Press Release-te siamin vawi tam tak an aupui bawk tih an sawi a. Amaherawhchu, Finance Minister leh Chief Minister thlak zung zung te, nupui thlak zung zung te leh mahni party thlak zung zungte chu thil buaithlak tak a nih thu sawiin, “Chuvangin MNF Party chuan heng hi tul a tih loh avangin a ti mai dawn bawk hek lo,” an ti a. “Heng thusawitu Party-te hian MLA 21 aia tam neia Sawrkar an siam hunah an duh tawka zingin Minister leh CM-te chu thlak mai zawk se a tha zawk ang,” tiin a chhan holam tê avanga hetiang thil aupui vak vak leh tih hi MNF Party chuan Mizoram tan tul leh thaa a hriat ve loh thu leh tih pawh a tum hek lo tih an sawi a, “MNF chuan CM leh Finance Minister thlak hi tul a ti lo tih hi mipuite hriatah kan han puangzar a ni,” an ti bawk.