Vawiin-ah State 3 atangin rawn thlen beisei

Mizoram mi leh sa, State dang-a awm te hruaihaw hna thawh mekah Vawiin hian Madhya Pradesh, Gujarat leh Karnataka atangin mi thahnem tak rawn thleng tura beisei an ni.

Heng State pawn-a awm te hruaihaw mekah hian Madhya Pradesh leh Gujarat phurtu Rel hi nizan dar 10:00 khan Bairabi rawn thleng tura beisei a nih laiin thlipui leh leimin avangin an lo thlen hun tur tak hi hriat a ni lova, Karnataka atanga lo chhuak Rel pawh hi tukin dar 6:00-a lo thleng tura ngaih ni mah se darkar engemaw zatin a khawtlai rin a ni.

Heng Mizoram-a rawn haw te lo dawngsawng tur hian inbuat-saihna engkim peihfel ni mah se thlipui leh ruah te sur thut thei a nih avangin Bairabi Rel chawlhmun pawh a tul anga thawmthat a ni a, ruahsur laia Screening kalpui theih a nih dawn loh avangin tangkhang lo haw te chuan Rel chhungah an lo nghak mai dawn a ni. Bairabi Rel chawlhmun paltlanga Tripura mi leh sa tangkhang, Agartala pana chuangtlang tur engmawzat an awm dawn a, anni pawh hi Bairabi Rel chawlhmunah hian eitur pek an ni ang. Tun tuma Mizoram mi hruaihaw te hi an District theuh ah kaltir leh nghal an ni dawn a, Bus Convoy inzui a thui deuh dawn avangin Officer Escort turte ruat belh nghal an ni a, kawng lak-ah hrisel lohna avang emaw, loh theihlohna engemaw vang a nih loh chuan Bus atanga chhuak tumah awm lo turin an vil dawn a ni.

Tun tuma rawn haw turte lo dawnsawn dan tur ngaihtuah hian nimin khan Kolasib District-a sawrkar mi pawimawh te chu an thukhawm a, he hunah hian District Bawrhsap, Dr. H. Lalthlangliana chuan Mizoram mi leh sa tangkhang lo haw te, Bairabi Rel chawlhmun atanga an District theuh an pan dan tur ruahmanna tlangpui sawiin, Zu rui motor khalh ah tumah an chuantir dawn loh thu leh hemi tur hian uluk tak a motor khalhtu tur te pawh inhrilhhriat thin a nih thu a sawi bawk.

Hetihlai hian Rajastan atanga rawn haw mi 142 te pawhin Vawiin tlai hian Rel hmangin Badarpur rawn thleng tura beisei an ni a,  Badarpur atangin Mizoram sawrkarin Bus-in a lo dawngsawng thung ang. Bihar atanga Mizoram-a raw haw tur Mizo 17 leh hnamdang 6 te pawhin tunah hian Bus hmangin Mizoram an rawn pan mek a, anni pawh hi Vawiin hian rawn thleng hman tura beisei an ni a. Uttarakhand-a tangkhang mi 56-te pawh niminpiah khan Bus hmangin Dehradun atangin Mizoram panin an rawn chhuak a, anni hi Rel leh thlawhnaa rawn haw turte an ni a. Delhi, Chandigarh, Haryana, Himachal Pradesh, Jammu & Kashmir, Noida, Punjab, Uttarakhand-a Mizo tangkhangte pawh Vawiin hian Special Train hmangin Mizoram panin an rawn chhuak dawn a, Delhi atanga rawn haw turte hi an vaiin mi 1426 an ni.