Telangana atangin Mizoram mi 474 an rawn haw

Rampum-a inkharkhip kalpui mekah nimin zing dar 8:40 khan Telangana-a Mizoram mi leh sa tangkhang 474 te chuan Shramik train hmangin Bairabi an rawn thleng a, nimin vek khan anmahni District theuh panpui nghal an ni.
Heng mi rawn haw te hi Kolasib DC, Dr H. Lalthlangliana leh SP, Vanlalfaka Ralte bakah thuneitu dang ten lo dawngsawngin Bairabi a lo thlen rual hian Rel chhungah ei leh in pek nghal an ni a, Screening point 10 kaltlanga endik vek an nih hnuah an District theuh panna tur Bus ruahman sa ah luhtir nghal an ni a. Rel Station an chhuahsan veleh Bus in Meidum khaw daia RAT neihna hmun an pan nghal a, Liason Officer te kaihhruaina hnuaiah anmahni hawna tur District theuh chu Bus 32 hmangin pan tir an ni.
Nimin-a Telangana atanga lo haw te hi an vaiin mi 474 an ni a. Aizawl Ddistrict a cheng mi 216, Lunglei District a cheng mi 30, Serchhip District a cheng mi 29, Kolasib District a cheng mi 40, Champhai District a cheng mi 41, Siaha District a cheng mi 35, Mamit District a cheng mi 22, Lawngtlai District a cheng mi 23, Saitual District a cheng mi 11, Khawzawl District a cheng 25 leh Hnahthial District a cheng mi 2 an ni.
Hetianga rampawn-a tangkhang te Rel hmanga hruai haw an nih avang hian Kolasib District thuneitute ruahmanna in Bairabi Rel Station a lo hawte sulhnu thianfai tur Sanitation Team din a ni a, anni hian Rel Station a duty-te leh zin haw te sulhnu thenfai ngai awm te chu fimkhur tak leh felfai takin an senghawi a ni.
Nimin a Bairabi rawn thleng Serchhip District mi 29 te hi nimin vek khan Bus pahnih hmangin Serchhip rawn panpui an ni a, Serchhip P&E Veng-a Vocational Training Centre-a dah tura ruahman niin dahluh an nih hma hian an hri-selna dinhmun enfiah sak vek an ni dawn a, hemi atan hian ruahmanna engkim peihfel vek a ni tawh bawk.

Comments

Chhiar Hlawhte