Chanchin thar thenkhat :


CM in NH. 54 a tlawh

Chief Minister, Zoramthanga chuan nimin National Higway-54 (Khamrang - Buichali) a hnathawh mek chu PWD-a Engineer te nen an enfiah. Nimin-a helai hmun a tlawhna ah hian Chief Minister, Zoramthanga chuan Furpui kan hmachhawn turah NH. 54, Khamrang leh Bui-chali inkar kawng hi a pin mai loh nan theih ang anga hmalak a, a chhe zual lai te thawmthat a ngaih thu sawiin, a tul a nih chuan State sawrkar sum pawh a remchan dan ang zela hman nise, a ti a. COVID-19 avanga rampum-a hna kallai a chawlh thuap hnuah tunah hian a theih theih hna thawh tan a ni leh tawh tih sawiin, State economy a inkhaichhuahna tura mamawh tam tak zingah inkalpawhna tha neih chu a pawimawh thu a sawi a, hnathawktute pawh thahnemngai taka hma la turin a chah bawk. Chief Minister hi PWD Engineer-in-Chief, K. Sawmvela, Chief Engineer (Highways), Lalmuankima Henry leh Officer dangten an tawiawm a ni.

Dawr kaptu a puh man a ni
Tunkar Thawhlehni, May 19, 2020-a NE Khawdungsei ram-a Zawng chi khat, Dawr (Presbytis phayrei) kaptu nia hriat Chinlalmuana s/o Thangzapianga, NE Khawdungsei chu man niin Chief Judicial Magistrate, Champhai District Court-ah thubuai ziahluh a nih hnuah Judicial Custody ah dah nghal a ni a. An In atang hian ramsa rep leh an ei tawhna ruh man anih bakah a kah nana hman a Silai hawh pawh man tel a ni bawk. Dawr hi nungcha humhalhna danah chuan humhalh nat ber (Schedule-I) hnuai ami a ni a, thiamloh chantir anih chuan kum 3-7 lung In tan leh pawisa chawi tir a hrem theih a ni.

Ramri-a Duty eitur hlan
Border Safety Monitoring Team, Kolasib District chuan ramri a hripui dona tura duty VLTF te tlawhchhuah hun an hman mekah nimin khan  South Chhimluang leh North Thinglian Village Level Task Force te tlawhin Buhfai, Dal leh Alu tam tham tak an hlan.

Scho tur sum dawng tawh
Mizoram Scholarship Board chuan tun thla ni 15 khan Post Matric Tribal Scholarship tur pawisa, Rs. 34,46,82,000/- chu Ministry of Tribal Affairs atangin a dawng a, Finance Department in Budget-a dah turin an buaipui mek a ni. Hetia sum dawn a nih avang hian reilote ah Zirlai Scholarship la dawng ve lo te pek theih beisei a ni.

Comments

Chhiar Hlawhte