Agriculture Minister in Roadside Market leh Online Organic Vegetable Market Chain a hawng

Agriculture Minister, C. Lalrinsanga chuan nimin khan Thingdawl Tuikhur Lu, Melriat-ah Roadside Market leh Online Organic Vegetable Market Chain chu hawngin COVID-19 hripui leng karah mahni In lum atanga duh zawng zawng thlai lei theihna tur, MizDen-mobile application chhawpchhuah a ni chu lawmawm a tih thu a sawi bawk.
Roadside Market leh Online Organic Vegetable Market Chain hawnna hunah hian Agriculture Minister chuan hetiang thil hawn theih a ni ta chu lawmawm a tih thu leh Mizoram loneitute tan rahbi thar a nih thu sawiin, Mission Organic Value Chain Development Programme in North Eastern Region Scheme (MOVCD-NER) hlawhtlinna chu hmuh theihin a awm ta tih a sawi a. Logistic Partner MizDen in Chemical tello a thlai tharchhuah te mimal In-ah an deliver thei tur chu Mizoram Agriculture Marketing bul intanna pawimawh tak a ni tih pawh sawiin, Loneitute aia kharchhawng ten hlawkna an neih hi thil diklo a ni a, Online Organic Vegetable Market Chain System-ah pawh hian Rate mumal taka kalpui a ni ang, a ti a. Mizoram sawrkar in loneitute dikna hi kenkawh a tum thu sawiin, Loneitute thlai tharchhuah man man taka lei pawh mipuiten kan inhuam tur a ni, a ti bawk.
Agriculture Minister, C.Lalrinsanga chuan Organic Farming attanga tharchhuah Organic Vegetable Market Chain siam turin tun kumtir atangin hmalakna kalpui a nih thu pawh sawiin, tun dinhmunah chhungkua 876 velin ram hectare 727 a zau-ah Organic Farming an kalpui mek tih a sawi a, he hmalakna hi Aizawl chhehvel khua 21-ah kalpui mek a ni, a ti bawk. Hei bakah hian Organic Vegetable Market Chain in District chu khawpui dangah kalpui turin hmalak mek a nih thu leh, Organic Farmer ten Organic Certificate an nei chho zel tih sawiin, India Organic Logo leh Jaivik Bharat Logo hmangin State danga Organic thlai thar te (produce) hralhchhuak thei turin hmalak mek a ni, a ti bawk a. COVID-19 hripui leng karah ram leilung behchhana ‘Mizoram Economy’ haichhuah tum a nih thu leh tha thlah miah lova tan a ngai tih a sawi bawk.
Aizawl District Spices Producer Organi-sation in Roadside Market an sak hi a dung ft. 32 niin, a vang ft. 8 a ni a, Market sakna atan hian cheng nuai nga (5) hmanral niin, MOVCD-NER Scheme hnuaia FPO te tana ruahman, Input Delivery System/Custom Hiring System pawisa leh an member ten Rs. 500/- an thawhkhawm atanga sak a ni a. Chemical hmang lova chin thlai thar chhuahte hi he market-ah hian lei theih a nih rualin, Aizawl-a chengte tan Online Marketing-MizDen kaltlangin order theih a ni tawh dawn a. MizDen Application hi playstore-ah download theih a ni.

Comments

Chhiar Hlawhte