Chanchin thar thenkhat :

DPR siam dan tur thlirho

Externally Aided Project (EAP) hnuaia Mizoram Tourism Department leh Sports & Youth Services Department te tana Department of Economics Affairs, Govt. of India leh Asian Development Bank (ADB)-in ruahmanna a siam dan leh DPR siam dan tur thlirhovin Inrinni khan CS Conference Room-ah Finance, Planning, Tourism leh Sports & Youth Services Department hotute chu an thukhawm a. He hun hi Sports Minister, Robert Romawia Royte chuan telpuiin COVID-19 avanga Mizoram Budget hnuaia sum hmuh tur zat a chian tak loh avangin Mizoram Budget pawn lam atanga hmasawnna sum tam zawk hmuh a tul zual thu leh EAP chu Mizoram tana sum hnar pawimawh a nih thu a sawi a. Ram tana rotling tur siam tura DPR siam a tul thu a sawi bawk.

BSG ten Aizawl-ah mask sem

Mizoram Bharat Scouts & Guides chuan Inrinni khan Aizawl khawpui chhung hmun hrang hranga chawhmeh zuarte hnenah hmai tuamna (mask) 1,000 an sem a, hemi atan hian an Member-te sum thawhkhawm atangin mask thui na tur hmanrua leiin, Organisers, Unit Leader, Rovers & Rangers, Scouts & Guides ten an thui a. State Council member leh Unit Leader te, Rovers & Rangers leh Scouts & Guides te chuan sem a ni. Mask sem tura kal te hi Sports & Youth Service Office-ah Sports Director leh Mizoram Bharat Scouts & Guides-a State Chief Commissioner, Lalsangliana chuan a vailiam a ni.

Vawk chi tha lalut thei rihlo

AH & Vety Department hotute chuan UK atanga Vawk tha chi lakluh an tum chu Assam chuanchung lamah vawk natna chi khat, African Swine Fever (ASF) a len avangin Mizoram panpui theih a ni hrih lo tih an sawi a, heng Vawk te hi New Delhi atangin Punjab lamah enkawl turin an dah niin an sawi. Hetihlai hian inkharkhip avangin ran chaw lamah harsatna a thleng lo niin an sawi bawk.

India ramah COVID-19 ala hluar chho zel

Nimin thleng khan India ramah COVID-19 kai hmuhchhuah mi 1,31,868 tling tawhin mi 54,440 te chu enkawl dam an ni tawh a, hei hi hri kai hmuhchhuah atangin 41.28% an tling a, nunna chan mi 3867 awm tawhin hei hi hri kai atangin 2.93 a ni thung a, tunah hian enkawllai mi 73,560 an awm mek a, hri kai hi an la pung chho zel rih a ni.

IR Office rawktu a puh man

May ni 19,2020 zan khan 2nd IR Office, Khawzawl ami chu misual ten rawkin a rawktu nia hriat, Biakzauva leh a nupui Muanpuii te chu manin thubuai an siamsak an ni a, Biakzauva hi 2nd IR, Khawzawl-a thawklai a ni. He Office rawk-tute hian Office pawisa nuai 3 chuang an la a, Rs. 1,62,500 hmuh let a ni bawk.

Zan lam Curfew pawtsei

Mizoram sawrkar chuan Lokdown inkaih-hruaina hman mek thenkhat ti danglamin, heng zingah hian ‘Mipui Vantlang tana inkhuah-khirhna hriat turte’ tih-a zan curfew hun chhung 'Tlai dar 7:00 leh zing dar 4:00 inkar' tih chu 'Tlai dar 7:00 leh zing dar 7:00 inkar' tiin thlak a ni.