BJP in ngaihtuah tha leh turin sawrkar an ngen

BJP Mizoram Pradesh Thalaite chuan Mizoram Finance Minister, Zoramthanga’n sawrkar hnathawk te hlawh puk sak an tum thu a puan chu tha an tihloh thu sawiin, Sawrkar chu inngaihtuah tha leh turin an ngen.

Nimin a thuchhuah an siamah BJP Thalaite chuan tunah hian khawvel pumah Supply Crisis leh Demand Crisis a thleng mek tih sawiin, thilman a sangin sum a vang hle bawk a, nitina inhlawhfa, eichawp zawng te'n an tuar nasa ber tih an sawi a. Demand Crisis ti bo tur chuan mipui kut a sum dah a ngaih thu leh Central sawrkar pawhin PMGKY hmangin vbc. nuai 20 chuang a thehchhuak tih sawiin, “Mizoram sawrkar erawh chuan mipui te sawrfu zawngin hma a la hi pawi kan ti a. Electric bill sang lutuk te, Tax chawi pangngai a chawi te, inngaihhnathiamna awm miah lova sawkar a kal hi pawi kan ti a, service hrang hrang hlawh pek loh an awm nual tawh lai a tuna sawkar hnathawk a nawlpui hlawh lak ti heu zawng a hmalakna awm leh ta hi mipui te sawrfu lehzualna a niin a tha lo hle a ni,” an ti.

BJP Thalaite chuan Mizoram sawrkar chu sum a mamawh takzet a nih chuan MLA Fund nuai tam tak chu pawtlet-a, a sawi mai ni lova a taka inrenchem taka lantir turin an ti a. Minister motor inzui duah duah te, tul lova nihna pawimawh in siamchawp te bansanin hemi atana sum luangral hi tihtawp anih chuan sum tam tak Mizoram Sawrkar hian an hum theih an rin thu an sawi a. Central sawrkar pawhin a tih angin inthlan laia an lo intiam tawh anga SEDP Sum nuai 3 sem tawh turin sawrkar chu an ngen bawk.