Buh tharchhuah kawnga sawrkar in Kolasib leh Mamit District-ah nasa taka hmalak a tum

Mizoram sawrkar Agriculture (Crop Husbandry) Director, Rohmingthanga Kawlni chuan Mizoram mamawh buh chawkluh kawngah COVID-19 avangin harsatna tawk thei kan nih thu sawiin, Buh tharchhuah kawngah Kolasib leh Mamit District-ah Sawrkarin nasa taka hmalakna kalpui a tum thu a sawi.

Nimin khan Agriculture Department hotute leh Kolasib District chhunga Leilet neitu ten COVID-19 avanga leilet neitute harsatna chungchang sawihona I&PR Conference Hall, Kolasib-ah neiin he hun a hmanpuina ah Agriculture (CH) Director, Rohmingthanga Kawlni chuan he thu hi a sawi a, Agriculture Director chuan tun dinhmunah Mizoram in mipuite mamawh buh hmun thum a thena hmun khat chaah kan la tharchhuah thu sawiin, Mizoram in kan mamawh buh tam zawk State dang atangin kan chawkluh thu leh COVID-19 avang hian harsatna tawk thei kan nih thu a sawi a. Buh tharchhuah kawngah Kolasib leh Mamit District chu Mizoram buhzem lian tak District an nih avangin Buh thar kawngah Sawrkarin nasa taka hmalakna kalpui a tum thu pawh sawiin, Kolasib leh Mamit District-a leilet zawng zawngah te buh chin khat vek anih theihna turin heng leilet te hi sawrkar chuan leilehna khawl hmanga an leilet te lehsak vek a tum thu a sawi a, Kolasib District mamawh Tractor leh leilehna hmanrua 32 zingah engemaw zat an pek tur thu a sawi bawk.
He hunah hian Agriculture (Research & Education) Director, Dr. H. Saithantluanga pawhin COVID-19 avang hian Agriculture lama kan kal zel dan tur ngaihtuah a ngai tih a sawi a, kan leilet enkawltu atan hnamdang vai kan chhawr an awm loh lai tak hian kan leilet te kan enkawl a ngai a, Sawrkar in theihtawp a chhuah hnuah leilet neitute lam pawhin theihtawp an chhuah ve a tul thu a sawi bawk.
He sawihona hun kaihruaitu Kolasib District Agriculture Officer (DAO), J. Rothanga chuan COVID-19 hri leng mek chu Agriculture lamin an tuar hle tih sawiin, Buh leh bal thar chhuah chu hunbi nei thil anih avangin hun lo kal zel turah harsatna kan tawh lohna tur leh he harsatna lo thleng thei sukiang tura in kokhawm chuk chuk an nih thu sawi bawk.

Comments

Chhiar Hlawhte