State pawn atanga rawn lut an awm zel avangin theihtawp chhuaha tanrual tul ti

Health Minister Dr. R. Lalthangliana chuan tun dinhmunah COVID-19 lakah Mizoram kan la him nia a lan rualin hmundang-a Mizoram mi leh sa awm mekte State chhunga engemawzat an lo luh tak avang leh an lo luh zel dawn avangin theihtawp chhuaha tanrual a ngai a ni, a ti.
Nimin khan Health Minister, Dr. R. Lalthangliana hovin COVID-19 Medical Operational Team Chairman, Dr. ZR. Thiamsanga bakah Health Department hotute, Doctor rualte leh Non-Governmental Hospital Association of Mizoram aiawhten phai atanga damlo lo haw te enkawl dan tur chungchangah Meeting Aizawl-ah neiin he thu hi Health Minister chuan a sawi a. Health Minister chuan COVID-19 chungchangah Health Department-a thawktute thawhrimzia a hriatpui thu sawiin, an thawhrimna rah hi Pathian in mal a sawm nia a ngaih thu a sawi a. Him ni-a kan lan lai hian zan hnih khat thil thu-ah COVID19 positive nei thei reng kan nih hriat erawh a tul a, theihtawpa fimkhur reng a ngai a ni, a ti.
He hunah hian COVID-19 Medical Operational Team Chairman, Dr. ZR. Thiamsanga MLA pawhin he Meeting koh chhan sawifiahin rampawn lam atanga lo haw mek zingah natna khirh tak, a bik takin Cancer natna vei, sawrkar Quarantine hmun emaw, mahni In-a Quarantine emaw rem lo, Hospital-a admit ngei ngei ngaite chungchang thu ngaihtuah a ngaih thu a sawi a. ZMC-in a mamawh Ambulance neih dan tur te, sawrkar Hospital dang te leh Private Hospital-te thawhho dan tur chungchang pawh inrawn tlan tul a tih thu a sawi bawk.
He hunah hian sawihona huamzau taka neih a nih hnuah Health Minister chuan an inrawnkhawmna eng atang hian rampawn atanga lo haw natna khirh zual vei mek damdawi In-a awm (admit) mamawhte awmna tur Hospital leh anmahni enkawl zui zel dan tur kaihhruaina sawrkar in rang taka a tihchhuah tur thu a sawi bawk.
ZMC tan bik Ambulance mamawh chungchangah rang taka ruahmanna siam a nih tur thu Meeting-ah hian ngaihthlak a ni a. District hrang hranga COVID Care Centre (CCC) leh Dedicated COVID Health Centre (DCHC) ruat a nih dan ngaihthlak niin hemi chungchang hi May 11-ah Mizoram Sawrkarin hriattirna (notification) a tichhuak tawh a. Aizawl Civil Hospital tan khum 10 awmna tur ICU nei tura ruahmanna pawh thui tak kalpui a nih thu tarlan a ni bawk.

Comments

Chhiar Hlawhte