Chanchin thar thenkhat :

Hospital tan Ambulance hlan

Indian Oil Corporation Ltd. (IOCL) Corporate Social Responsibility (CSR) sum atanga Ambulance dawn thar chu nimin khan Kolasib bialtu MLA leh Supply Minister, K. Lalrinliana chuan District Hospital, Kolasib-a hman turin a hlan a, he hunah hian Supply Minister chuan Kolasib District Hospital in a mamawh em em, damlo phurhna tur Ambulance neih a nih theih nan February 2019 atang khan IOCL hotute nen indawrna neih tan a nih thu a sawi a, a tul ang angte DC Office, Kolasib kaltlang a buaipui a nih hnuah January 2020 khan tihfel a nih thu leh tuna hman theih tura inhlan a ni ta chu lawm-awm a tih thu a sawi bawk.

ICICI Bank in hlan

ICICI Bank, Mizoram in Corporate Social Responsibility (CSR) atanga COVID-19 dona atana hmanrua (equipments) Rs. 4,99,996 man hu an lei chu nimin khan Health Minister Dr. R. Lalthangliana hnenah an hlan a, heng an hman-raw hlan te hi Nebulizer pakhat Rs. 2800t- man 55; Pulse Oximeter pakhat Rs. 2171t- man 72 leh Q Amp Viral RNA Mini Kit 25052906 Qiagen pahnih, Rs. 94,842t- man ve ve te an ni.

Thu diklo post tu man a ni

Zirtawpni kalta zan-a Social Media-a ‘Khatla North Quarantined Positive 1 an awm ta maw, engzah tak awm ang maw rawn haw ho mi 10,000 zingah hian… Kan sawrkar chak tak hian a puang vat vat turah ngai ilang’ tih post chu thu diklo a nih avangin he thu post tu Aizawl Bungkawn Veng-a mi pakhat, kum 33 chu Police ten manin thubuai siam sak a ni.

CM in Lengpui Airport tlawh

Chief Minister, Zoramthanga chuan nimin zing khan Lengpui Airport tlawhin, Airport tih-changtlun hnathawh kal mek a enfiah bakah Thlawhtheihna a damlo, loh theih loh avanga lo phurh haw an awm thulha lo dawnsawn dan tura ruahmanna te a en a,Airport Medical Officer leh Civil Aviation leh PWD hotuten an tawiawm a ni.

Zah thupna niin sawi

MNF General Hqrs. chuan thuchhuah siamin Congress Party in Chief Minister leh Finance Minister ni bawk, Zoramthanga chu ‘Mizoram sum dinhmun dik tak sawi thei lo a nih avangin bangin Finance Minister hna hi midang pe rawh se’ an ti chu COVID-19 dona atana Ruling Ministers leh MLA-te bakah, Opposition MLA, ZPM leh BJP te pawhin phal takin an thawh vek laia Congress MLA ten sum thawh an ui zah thupna a nih thu an sawi a. Congress chu an sawrkar laia sum an enkawl thiamloh zia mipui ten kan la hre reng nia sawiin, kum 2010 khan cheng vbc. 70 an tih-lapse tawh bakah sikul naupang uniform leina tur cheng nuai 743.16 an ti-lapse tawh bawk niin an sawi.

PRISM in lungchhiatthlak ti

PRISM Party Thalaite chuan COVID-19 avanga India a buai hnuah State dangte chuan mipui mimir chhawmdàwlna hrang hrang an mipuite tân duangin an lûang chhuak nia sawiin, kan ram-ah thung chuan a sawrkâr zâwk tanpui ngâia a awm leh mipui mimir chhawmdàwl zâwnga sawrkârin ke a la pên ve lo chu lung-chhiatthlak an tih thu an sawi a. Kan Finance Minister, Zoramthanga'n, “Kan Budget hi chêng vaibelchhe sìng chuang a ni hrim hrim a. Kan duh chûan kan kang thei a, kan chhum thei a, kan bai thei bawk..." a lo tih tawh chu tùn hi a taka hman hun nia an hriat thu pawh an tar-lang bawk.