END in kum kalta ah an Target an hmu phaklo

Excise & Narcotics Department chuan sawrkar kum liamta chhung khan Chhiah chi hrang hrang Rs. 2,72,73,718/- hmuin an target cheng nuai 500 chu an hmu phaklo.
Excise & Narcotics Department hian sawrkar kum liamta, April 1, 2019 atanga March 31, 2020 inkar chhunga an hnathawh hrang hrang tarchhuakin hemi chhung hian Chhiah chi hrang hrang an hmuh chu Rs. 272,73,718/- a ni tih an tarlang a. Chhiah an hmuh tamna ber, Foreign Liquor & Spirit atangin Rs. 255,95,869/- hmuh niin Fines & Confiscation-ah Rs. 98,190/- hmuin thildang ah Rs. 15,79,659/- an hmu bawk a ni.
Sawrkar kum liamta chhung khan tualchhung siam Rakzu litre 1,02,676.145 zet manin Zu bilhlai Tin 148,833 zet an man bawk a, Dawidim Kg. 553.170 zet an man bawk a, Zu siamna bel 1095 zet an man bawk. Hemi chhung hian Sapzu (IMFL) um puitling 16,263 manin a chanve um 11,815 an man a, Quarter Bottle 12,039 zet an man bawk. Hei bakah hian Beer pawh um 4068 manin Canned Beer 10,883 an man a, rampawn atanga lakluh Zu um 894 leh Beer um 10 leh Canned Beer 1541 an man bawk a. BEDC, Grape Juice leh Apple Juice pawh tam tham tak an man bawk a ni.
Nikum chhung khan damdawi leh ruihhlo pawh tam tham tak man niin Heroin Kg. 15.826 zet man a ni a, Opium Kg. 2.177; Ganja Kg. 332.351; Pseudoephedrine Kg. 90.692 leh Methamphetamine Kg. 147.388 man a ni a, Nitrazepam mum 555; Diazepam mum 52, Alprazolam mum 6204; Cough Syrup bur 26,579; Tramadol mum 9828; Dextropropoxyphene capsules 25 leh Bruprenorphine mum 48 an man bawk. Heng Zu, ruihhlo leh a kaihhnawih an man atang hian NDPS Act. 1985 hnuaiah thubuai 840 ziahluh mi 1150 man an ni a; MLP Act, 2019 hnuaiah thubuai 2446 ziaklutin mi 1729 man an ni a. MLPC Act, 2014 hnuaiah thubuai 438 ziaklutin mi 354 man an ni a, ME Act, 1973 hnuaiah thubuai 113 ziaklutin mi 111 man an ni a, ramdang mi 40 man an ni bawk.

Comments

Chhiar Hlawhte