Serchhip-III VC huamchhunga lei chetna Serchhip District Bawrhsap in a tlawh

Nimin zing-a ruah sur avang khan Serchhip-III VC huamchhung, Serchhip Kanan Veng mawng lam-a lei che thin chu che lehin chenna In pakhat ban engemaw zat khaiin luahzui ngamloh in a awm a, nimin vek khan Serchhip DC, Dr. Lalzirmawia Chhangte chuan a hmunah a tlawh nghal.

Serchhip Kanan Veng-a lei chetna hmun hi F. Lalneihkima te kawmthlang niin kumdang ah pawh helai hmun hi a lo che tawh thin a, hei vang hian In neitute pawhin luah zui ngam lovin an chhuahsan hnuah midang chhungkaw pahnih, Lalpianruala leh Vanlalhriata te chuan an luah a, In hnuai zawk luahtu Vanlalhriata te chuan nimin chawhma dar 10:00 vel khan lei hi a che nia sawiin, an bungrua te pawh an thiarchhuak nghal a, In chung zawk luahtu Lalpianruala te erawh In-ah hian an awmlo thung a ni.

Helai lei chetna hmun hi kumdang ah pawh a lo chet fo tawh avangin Serchhip-III VC te chuan In hi luah ngam a nih theihna turin hma an lo la tawh a, amaherawh chu tunhnaiah inkharkhip kalpui a nih tak avangin hna kallai hi chhunzawm thei lovin an awm mek a ni. Nimin tlai vek khan Serchhip District Bawrhsap, Dr. Lalzirmawia Chhangte chuan helai lei chetna hi a hmunah kalin a enfiah nghal a, Serchhip-III Village Council te nen helai hmun siamthat vat anih theih dan turte sawiho nghalin, chhiat tawkte hi Silpaulin a hlan nghal bawk.

Serchhip District Bawrhsap hian nimin tlai vek khan Serchhip Tuikhuah Veng-a lei tlak-hniamna hmun leh lei tlahniam zel tur venna atana hnathawh hrang hrangte chu a hmunah a tlawh nghal bawk a, ruahtui tam avanga kawngsir lei tla bal te a rang lama siamthat hna thawh dan tur pawh Serchhip-III Village Council member te nen an sawiho nghal a ni. Nimin a heng hmun a tlawhna ah hian Bawrhsap hi SDO (Sadar), C. Lalduhzuali chuan a tawiawm a ni.

Nimin zing-a ruahsur avang khan Aizawl Zuangtui Industrial Estate-a K. Lalmalsawma te chenna In pawh chimin he In chim lai hian mi 6 awmin mi 3 te chu a chim hnan a, mi 2 ten hliam an tuar a. Hei bakah hian Durtlang Leitan Koh-hran Hall sak lai pawh chimin mihring thi leh hliam an awmlo thung.