MEIZIAL LEH COVID-19

MEIZIAL LEH COVID-19

- C. Lalrempuia

Kan hriat theuh angin Mizote hian Vaihlo zuk leh hmuam hi kan ti nasa em em a. Global Adult Tobacco Survey (GATS) 2016 - 2017 zirchianna atanga a lan danin tunah hian Mizo mipui 58.7% vel hian vaihlo zuk leh hmuam eng chi emaw ber an hmang mek a ni. Heng zingah hian Meizial zu thin tam berin 25.1% lai an ni a, 9.2% in a zuk mai duh tawk lovin a hmuam chi nen an ti kawp thin a, 24.3% in a hmuam lam chauh an ti ve thung.

Cigarette a vang! A man lah a to!

COVID-19 avangin a khawvel pumin kan buai mek a, kan ramah ngei pawh inkharkhip avangin kan sumdawng/dawrkai ten bungrua lakluh lamah harsatna lian tak an tawk mek a ni. Hei vang hian zuk leh hmuam ti thin te pawhin harsatna an lo tawk ve nasa khawp mai. Zuk leh hmuam lei mai tur a vang a, a tel lo a awm harsa an ti tawh bawk si.

Hrileng avanga kan buai hma a kan Cigarette zuk thin te hmuh tur a vang em em a, khawi khaw/ram chhuak cigarette nge tih hriat mang loh kan hum ta fur a, kan hmuh theih ang chhun chhun lah a man a sang thin hle.

COVID-19 lakah invennan Meizuk a tha?

Tunhnai mai khan France khawpui Paris a dawmdawi In pakhat, Pitié-Salpêtrière Hospital a mi thiamte chuan Meizu mi te hi a zu ve ngai lo te aiin COVID-19 lakah an him zawk an ti ve tlat mai! Heng thu te hi Mizoram lamah ngei pawh Facebook leh Whatsapp Group hrang hrang ah copy paste hmuh tur a tam a, kan hre fur tawhin a rinawm.

France ram a mithiam ten an zirchianna ah hian Meizial a chemical chi khat Nicotine hi COVID-19 lakah invennan a tha an ti a. Wales ram Doctor te pawhin Meizial a awm Chemical chi khat, Nicotine chuan mihring timur (Cell) a Corona Virus lut tur a veng thei an lo ti ve mek bawk.

Amaherawhchu heng zirchianna ah te hian Nicotine hi drugs chi khat, zuk leh hmuam min addict tir thin tu a nih thu sawi telin, mihring taksa a nghawng tha lo a neih thin te an sawi tel tlangpui a, a tha ziktluak tawk lo a ni te pawh a tih theih ang.

COVID-19 leh Mei zuk a inrem lo!

Hetihlai hian Public Health England chuan meizial zuk hi Chuap tan a that loh bakah thawkna lam a harsatna min thlen theitu langsar tak a nih avangin Mei zu mi te chu COVID-19 lakah an him lo zawk an ti ve thung a. Zirchianna atanga a lan danin COVID-19 hi meizial ang bawk a kan respiratory system tana natna hlauhawm tak mai a nih avangin mei zuk nen chuan thil inhmeh lo tak a ni a tih theih ang.

France Govt. Health Officials pawhin mei zuk thatloh zia leh vaihlo avangin kum khatah mihring 75,000 chuang an ramah an thih thu chu BBC News ah an lo tarlang tawh a ni.

World Health Organisation (WHO) chuan meizial zuk chu mihring taksa hriselna tichhe thei tu mai ni lovin COVID-19 kaina chance sang tak min siam thei tu a nih thu an sawi a, “Meizial kan han zuk hian kan kut zungtang leh kan hmui a insik fo avangin kan ka chhung a natna hri luh theihna chance a sang hle a. Tin, Mei zu mi te hi Chuap lam that lohna nei an nih thin avangin natna hlauawm zawk an vei awlsam bik hle,” tiin COVID-19 lakah Meizuk a him lohzia an sawi.

Fing la, bansan rawh

He natna hrileng COVID-19 atang hian mi tin ten taksa hrisel tha, Chuap leh Lung hrisel tha kan mamawh zia a lang a. Tun hi mei zuk kan simnan a hun tha tak a ni tih hre thar ang u. Nang leh in chhungkua in lo hrisel zawk theih nan vaihlo (zuk leh hmuam) hi lo bansan ngei la, nangmah mai a bansan har I ti a nih chuan Tobacco Cessation Clinic (TCC), District Hospital Serchhip-ah OPD hun chhungin an lo tanpui thei reng che a ni.