Congress Legislature Party in an May thla hlawh COVID-19 dona atan CM hnenah an hlan

Congress Legislature Party (CLP) Leader, Zodintluanga chuan CLP Member ten tun thla (May, 2020)-a an hlawh chu a vaiin Chief Minister Relief Fund-ah nilo, COVID-19 dona atan Chief Minister hnenah an thehlut dawn tih sawiin, boruak a zira an chet zel tur thu a sawi bawk.

Nimin chawhnu dar 1:00 khan Congress Legislature Party (CLP) chuan Aizawl Press Club-ah Press mite kawmin CLP Leader Zodintluanga, MLA chuan Congress MLA ten COVID-19 dona atan an Basic Pay atangin May, 2020 hlawh zaa za (100%) chu an chhunluh tur thu sawiin, he thuchhuak hi May 19-a Congress Legislature Party Meeting thurel a nih thu a sawi a. “Kan May thla hlawh zaa za hi CM's Relief Fund-ah pe lovin COVID-19 dona turin Chief Minister Office-ah kan thehlut ang,” a ti. CLP Leader chuan khawvela hripui len dan enin boruak a la kal zel dawn avangin a tul angin CLP te an chet zel tur thu Press mite a hrilh bawk. MLA te basic pay hi Rs. 80,000/- niin Congress MLA panga hian cheng nuai li (Rs. 400,000/-) an chhunglut a ni.

Zodintluanga chuan tunhnaiah Congress Party OB leh Congress Legislature Party inhmukhawm neih a ni tih sawiin, “Party thu leh hla chu Chief Minister hova NGO leh sawrkar mi pawimawhte intawhkhawmah Pu Joseph Lalhimpuia, Secretary MPCC khan a report tawh a. Congress chuan MLA Fund hi he hripui dona atan hian 100% hnuhkir nise tih a ni a, hemi hnu hian thu leh hla a awm tak lovah chuan CLP Meeting chuan kan MLA Fund chu COVID-19 dona atan a tha thei ang bera hman theuh kan rel ta a ni,” a ti bawk.

Tunhnaia Assembly Speaker hova Legislature Party hrang hrang Meeting chungchang pawh sawiin Zodintluanga chuan, CLP Member Aizawl-a pahnih chauh an awm laiin Assembly Secretariat atangin zan dar 10:00 velah Phone Call dawngin a tuka Committee chungchang hrilhhriat a nih thu a sawi a. CLP Member pahnih hian a hma daih tawhin ramri-a Mizo thalai duty leh Task Force te tlawh turin ruahmanna an lo siam tawh avangin a tuk zingah an liam ta mai tih a sawi a. “Keini kha programme nei sa kan ni a, Kan zinna atangin MNF, ZPM leh BJP te chuan hlawh basic 30% leh MLA fund cheng nuai 50 'cut' tur tih an lo rel a. Keini kan awm loh avangin 'An duh angin an rel ang' tih an lo rel a. Hei hi thil awm zen zen lo a ni,” a ti bawk.

Khami tuma hlawh leh MLA Fund 'cut' an rel chu MNF Legislature Party rorel lawk sa vek a lo ni tih statement atangin hmuh a nih thu pawh sawiin, “ZPM te pawh khan MNF Legislature Party rel sa kha an pawmpui mai a ni. Kei pawh lo tel ni ila Congress Legislature Party rel bak chu thu ka keng thei lo a ni,” a ti.

Sawrkar hnathawk hlawh 'cut' chung-changa Statement an siam chungchangah CLP Leader, Zodintluanga chuan, “A hma khan Chief Minister khan pawisa a tam thu a sawi a, heti a nih chuan sawrkar hnathawk hlawh 'cut' hi kan tawn tur chin kan la hre lo bawk nen a la hun lo kan ti a. CM hian pawisa a harsat chuan sawi se MLA te hi a thawh hmasa tur kan ni ka ti mai a ni,” a ti bawk.

He hunah hian Lawngtlai West bialtu MLA, C. Ngunlianchunga pawhin MLA te chu mahni bial hrechiang bertu an nih avangin CM Relief Fund-ah te pawh rawn emaw tal an pawi-mawh thu a sawi a. Congress MLA te chu mahni bial theuha buai taka Hripui do-a hma an lak avangin CLP Meeting pawh an neih har phah tih a sawi a. Hachhek bialtu MLA, Lalrindika Ralte pawhin CM Relief Fund chungchanga a thusawi an sawichhawng dik lo chu pawi a tih thu sawiin, Minister ten an sem tho chuan MLA te pawhin hriatpuiin sempui ve a that thu a sawi niin a sawi bawk.