Quarantine chungchanga inkaihhruaina siam a ni

Mizoram sawrkar chuan rampawn atanga Mizorama lo haw te leh State chhunga awm sa khunghran (Quarantine) ngaite hriat leh zawm tur a tichhuak.

Hemi chungchanga sawrkar thuchhuah in a tarlan danin Quarantine hun rei zawng hi chawlhkar li (4) niin Sawrkar leh Kohhran hmuna chawlhkar hnih (2) chhung Quarantine-a awm hnuah mahni In theuh ah haw in a chawlh karthumna chu Home Quarantine uluk taka kalpui tur a nih thu a tarlang a. Hemi chhung hian chhungkaw member dangte nen ei leh in leh thildang ah hmanrua leh thawmhnaw te intawm loh tur a ni a, Social distancing chhungkua-ah tha taka tih tur a ni. In lama Quarantine chawlhkar hnuhnung ber erawh chu zangkhai taka kalpuiin mahni in chik leh in ngaihven chunga self-monitoring atana hman tur a ni a. Home Quarantine chhung hian chhungkaw member zawng zawngte mawhphurhna a sang a; an chhungkua leh khawtlang himna an kutah a awm tih hria in chungkua-ah Social Distancing uar taka kalpui tura beisei an ni tih a tarlang bawk.

Sawrkar leh Kohhran hmun (quarantine facilities) atanga In lama phur hawtu motor khalhtute hi a hranpa a Quarantine an tul loh avangin harsatna siam sak loh tur a ni a. Sawrkar leh Kohhran hmun Quarantine hun hmang zo tawh, mahni In lama haw turte chuan mahni awmna veng Local Task Force-te be hmasa in an remruatna fel tak hnuaiah mahni In a haw tur a ni bawk.