COVID-19 damlo enkawltute lawmthu hrilh

Health & Family Welfare Minister Dr. R. Lalthangliana chuan tunhnaia COVID-19 natna vanga Zoram Medical College (ZMC) a damlo awm enkawl damtu Doctor leh nurse te chu niminpiah tlai khan a Pisa-ah kawmin an inpekna leh huaisenna fakin thilpek a hlan bawk.
Niminpiah tlai-a ZMC-a COVID-19 damlo enkawltute a kawmna hunah hian Health Minister chuan COVID-19 vanga damlo enkawl damtute chu Mizoram tan COVID-19 pasalthate an ni tih sawiin, an inpekna leh huaisenna bakah Pathian kaihhruaina leh Mizoram chhung leh pawna mi thahnemngaite tawngtaina chhanna a ni tih a sawi a, record ropui leh chhuanawm tak an nei tih sawiin, COVID-19 damlo enkawltu zawng zawngte chungah lawmthu a sawi a. Health & Family Welfare Department inbuatsaihna pawh a tha tawk a ni tih hei hian a tilang tih sawiin, Department a thawktu zawng zawngte thahnemngaihna chu theihnghilh chi a nilo, a ti a. ZMC-a Sample Testing Laboratory nei tura hmanhmawh taka hmalak a nih thu leh COVID-19 hlauh vanga hnathawk tur an inhmuh-zawh loh laiin Mizoram Police mi 15 lai mai ni hnih chhung hnatlanga an thawhchhuah avangin Sample Testing Laboratory pawh a hun takah kan nei thei a ni, tiin Mizoram Police chungah lawmthu a sawi bawk.
He hunah hian Dr. PC. Lalramenga, Head of Department, Medicine, ZMC chuan COVID-19 do tura ZMC inbuatsaihna a tha tawk tih sawiin, kumin January thla tawp lam atang khan mumal takin inbuatsaihna kalpui a ni a, ZMC a thawk ten training tha tak an lo neih tawh avang leh hotuten hma an lo lak hma avangin COVID-19 positive case Mizorama a awm pawhin an talbuai lo tih a sawi a. COVID-19 natna chu natna hriatchian har tak a la ni rih tih pawh sawiin, damlo enkawlna ah pawh chi-ai lova an thawh turte an thawh thu a sawi bawk.
COVID-19 vanga damlo enkawltute hi Doctor 8, Ward Superintendent 3, Nurse 25 leh IV-Grade 4 an ni a, COVID-19 natna vanga damlo hi a taksa ah virus a inthlahpun tam deuh avangin enkawl dam chhung hi a rei deuh ni a sawi a ni a, damdawi In-ah hian ni 45 awmin May ni 9, 2020 khan dam takin a chhuak a, a chhuah hnu hian Home Quarantine ti chhunzawmin tunah hian a zofel tawh a ni.
Damlo enkawltute hian damdawi an pek danah ICMR leh AIIMS Protocol fimkhur taka an zawm thu sawiin, tunah hian ICU-ah damlo a rualin 14 an enkawl theih thu leh a tul dan huna hman atan ICU khum 22 awm theihna ruahman lawk a nih thu an sawi a. Mizoram pawna tangkhang lo haw turte uluk taka monitor atula an hriat thu sawiin, a bik takin Red Zone leh Containment Zone atanga lo haw te chu vil uluk zual a tul an tih thu an sawi bawk.

Comments

Chhiar Hlawhte