Electric Bill zaa 50 tala tihniam turin sawrkar phut

MPC Thalaite chuan Electric bill 50% tal a tihhniam turin Mizo-ram sawrkar chu an phut thu an sawi.
Nimin a thuchhuah an siam ah MPC Thalaite chuan Mizoram-ah lockdown chhungin a hun taka Electric Bill pek theih a nih lo leh Bill pek tlai man (late fee) chawi lo tura thuneituten mipuite min ngaihhnathiamna chu lawmawm an tih hle tih an sawi a. Amaherawhchu, bill pumpui atanga 50% tal chu mipuite ruahman sak an nih zawk theihna tura hma la tura P&E Minister an phut thu sawiin, vanduaithlak takin COVID-19 hri leng avangin Zoram mipui 70% thawhchhuah nei lovin thla hnih chhung kan inkharkhip tih an sawi a. Hetiang a nih avang hian chhungkaw tam zawk ten sum leh paiah harsatna nasa tak kan tawkin, nitin ei leh bar leh mamawh hrang hrangte thawhchuahna kawng a awm loh avangin kan êng chhitman pawh mi tam zawk tan pek tur neih a harsa tih an sawi a. A zawng a zaa in ngaihhnathiam a harsa a nih pawhin 50% tal hi chu mipuite ruahman sak an nih theih nan arang thei ang bera hma la turin P&E Minister chu an phut thu an sawi a ni.
Hei bakah hian MPC Thalaite chuan tunhnaiah Electric bill san lutuk avanga mipuite manganna siamtu P&E Department te hnathawh dan buarchuar tak lo lang chu an dem thu pawh sawiin, uchuak taka Electric Bill siam sakte zawng zawng, dik leh fel fai taka siamtha leh turin P&E Department chu an chah bawk.

Comments

Chhiar Hlawhte