Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

Quarantine Centre-a awm te tan chawhmeh hlan

Presbyterian Baktawng Venglai Kohhran te chuan Serchhip District chhung Quarantine Facility Centre hrang hranga awm mek te tan nimin khan chawhmeh chi hrang hrang leh pawisafai chu District Level Task Force on COVID-19 Chairman, Dr. Lalzirmawia Chhangte hnenah an hlan.
Heng thilpek inhlanna hun Serchhip DC Office tual-a neihah District Bawrhsap, Dr. Lalzirmawia Chhangte, IAS chuan, Baktawng Venglai Presbyterian Kohhran chungah lawmthu sawiin, an thiltih chu chhuanawm leh entawn tlak tak a nih thu a sawi a, a tul huna Kohhran in sawrkar a tanpuia a thawhpui thin chu chhinchhiah reng tlak thil tha a ni, a ti a. An thilpekte chu tuna khunghran mekte tan a tangkai thei ang bera hman a nih tur thu a hrilh nghal bawk.
Baktawng Venglai Kohhran te hian Pickup Truck hmangin an thilpek te an rawn phur a, an Kohhran Secretary, Upa K. Vanzama chuan hetianga thil an pek chhan tlangpui sawiin, khung-hran mekah hian Baktawng mi leh sa te an lo awm ve bakah, Kohhran chuan theih ang tawka he hripui laka kan him theih nana sawrkar tanpuia, tihchak tha an tih thu a sawi a. An thil pek te hi Sapthei hnah, Oil Palm zik, Balhla, Thingthupui, Phuihnam, Antam, Maian leh Alu bakah pawisa fai Rs. 10,000/- a nih thu leh Kohhran mipui ten an thawhkhawm a nih thu a sawi bawk.
Nimin-a thilpek hlan tur hian bialtu Pastor, Benny Lalmawia leh a nupui, Rebecca Zai-remmawii bakah Kohhran Committee atangin Upa K. Vanzama, Upa C. Tawnluia, Upa Hma-sawnzela leh lirthei khalhtu C. Lalchangliana te an rawn kal a. Serchhip District Bawrhsap, Dr. Lalzirmawia Chhangte bakah Addl. DC HD. Lalpekmawia leh SDO (Sadar) C. Lalduhzuali bakah thawktu dang ten lo dawngsawngin heng an thilpek te hi nimin vek khan Quarantine Centre hrang hrangah pekchhuah nghal a ni.

Comments

Chhiar Hlawhte