All Mizoram Village Council Association ten Chief Minister hnenah Memorandum an thehlut

All Mizoram Village Council Association (AMVCA) hruaitute chuan nimin khan Chief Minister, Zoramthanga chu a Pisa-ah hmuin COVID-19 dona leh invenna leh thingtlang lam Economics chawikan dan tur chungchangah Memorundum an thehlut.
AMVCA hruaitute hian Chief Minister hnenah hian Thingtlang mite tan COVID-19 hripui laka inven fimkhur theihna tur Guideline hran sawrkarin siam se an duh thu thlenin, COVID-19 avanga chi-ai emaw, uchuak taka hlauhna nunpui chu invenna tha ber nih tawh loh avangin thingtlang mi ten nunphung ralmuang neih leh vat-a, taima lehzuala hnathawh theih a, chumi hawia sawrkarin Programme mumal tak a neih an duh thu an sawi a. Hripui avanga Tam lo thleng turah Thingtlang lam inbuatsaiha, thlawhhma la zau-a, chuktuah huan thlenga hmala tura an in fuih nasat thu pawh sawiin, COVID-19 leh Tam lo thleng thei tura invenna kawng hrang hrangah VC te thu ngai pawimawh turin sawrkar chu an ngen bawk.
Hei bakah hian Mizoram State chu Agricultural Sector-a thui tak innghat kan nih avangin Thingtlang lama Agricultural & Allied thlawhhma kan neih mekte Statistical Data chipchiar taka chhiarpui neih tul an tih thu leh he Data atanga Agricultural Marketing System tha zawk kalpui vat tul an tih thu an sawi a. India ram Economies pangngai ban chho leh tura pawimawh ber chu thingtlang kut hnathawktute tharchhuah leh dehchhuah-a innghat a nih thu pawh sawiin, thingtlang mite tana sum hnar (Regular income) awmchhun chu MGNREGS a nih bawk avangin MGNREGS Schemes in a phal angin tun dinhmunah Thingtlang mite kum khata ni 100 aia tam inhlawhna tur ruahmanna siam turin an ngen bawk.
AMVCA chuan MGNREGS Material Component pawisa chu mimal hna inpe a Party worker invulhna tur a ni lo tih pawh sawiin, VC/VEC leh mipuite rawn lova DRDA leh BDO Office atanga MGNREGS Material Component hna lo kalpui ngawt thin chu tihtawp nghal an phut thu an sawi a. Hetiang a kalpui hi MGNREG Act kalh anih thu pawh sawiin, MGNREGS pawisa hmanna thil reng reng chu mipui thlan Village Council/Village Employment Council ten mipui Vantlang duhdan rawn zela kalpui a ni tur a ni, tiin MGNREGA in a sawi anga MGNREGS felfai taka kalpui a nih loh chuan Central sawrkar emaw, Court-ah emaw an zualko ang tih an sawi bawk.

Comments

Chhiar Hlawhte