Mizoram-ah Thermal & Optical Bi-spectrum Camera

India hmarchhak State zinga a hmasa ber ni turin Mizoram chuan Thermal & Optical Bi-spectrum Camera a nei thar a, nimin khan Lengpui Airport-ah bun nghal a ni.
Sawrkar laipuiin ramchhunga Airport hrang hrangte karleh Thawhtanni, May ni 25, 2020 atanga hawn tan a tum mek laiin Airport hawng thei tura neih ngei ngei ngai, Thermal & Optical Bi-spectrum Camera chu Mizoram sawrkar-a Health & Family Welfare Department chuan India hmarchhak State zinga a hmasa ber turin niminpiah khan a chah thleng a. He Thermal Camera hi niminkhan Lengpui Airport-ah hman theih tura dah (install) nghal a ni.
He Thermal Camera hmang hian Meter hnih (2) danah Khawsik leh sik loh a en theih a, vawikhat-ah a rualin mi 10 a endik theih dawn avangin khualzinte tan pawh hun a heh loh dawn bakah rang takin he Thermal Camera in a lak Data te leh ID te chu Email leh whatsapp hmangin COVID-19 lam buaipuitute a thawn zung zung thei nghal tawh dawn a, a lo endiktute tan pawh meter hnih (2) dan atang a nih tawh dawn avangin a him viau tura ngaih a ni. Hemi rual hian State dang atanga Mizoram luhka lian zual deuh Bairabi leh Vairengte Screening Centre-a hman tur Handheld Thermal Camera pawh dah a ni dawn a, hei hian nasa taka mihring lo lut tur endik kawngah a puih beisei a ni.

Comments

Chhiar Hlawhte