Zan hnihkhat thil thuah fimkhur loh avanga chhiatna vawrtawp thleng thei reng kan ni - Health Minister

Health Minister, Dr. R. Lalthangliana chuan tun hun hi fimkhur ngaih hun lai ber a ni tih sawiin, “Zan hnih khat thil thuah fimkhur loh avanga chhiatna vawrtawp thleng thei reng kan ni,” a ti.
Vawiin atanga Inkharkhip Thawhlina (Lockdown 4.0) kalpui leh tur chungchanga Mizoram mipuite hnena thuchah a tihchhuah ah Health Minister, Dr. R. Lalthangliana chuan Lock down period thawhthumna chu Pathian hruaina in kan hman zawh tak thu leh Sawrkar pawhin uluk takin hmanraw chi hrang hrang nen hma lain, State/District/Local Task Force te, Kohhran leh mimal ang ten theihtawpin hma kan la theuh tih a sawi a, chumi rah duhawm tak chu Pathian pawhin mal min sawm sakin, ram pawn atanga lo lut (imported case) pakhat ZMC-a enkawl chu a lo damchhuak ta tih a sawi a. Hei hi Kohhran leh mimal tinte tawngtaina Pathian min chhanna a ni tih sawiin, “Tunah tak hi chuan kan hriat theih chinah COVID-19 hri vei Mizoram-ah kan awm ta rih lo. India ram hmun hrang hang atang pawhin Mizoram sawrkar leh Task Force hrang hrangte kan inpekna leh thawhhonaah pawh fak kan hlawh ve hle a ni,” a ti.
Health Minister chuan lockdown kenkawh chungchangah loh theih loha ei leh bar lakluh kawngah a pawilo chinah inthlahdul deuhin thil kalpui mek a nih thu sawiin, kan ram mi leh sa te ngei, State hrang hrangah hun rei tak tangkhang te lakluh hna ngawrh takin kalpui mek a nih thu leh lo haw turte hi an zat chiah pawh hriat harsa khawpin mi sing chuang dawn tling tura ngaih an ni tih a sawi a. State dang atanga an lo luhna Gate pui hawnsak an nih avang leh tam tak an rawn haw takah chuan, hri kai tamna hmun thui tak paltlanga rawn haw mekte an nih avangin kawng lakah kai palh thil pawh awm thei a nih thu a sawi a. Hei vang hian kawng tinreng ah a hma aia nasa taka kan fimkhur tlan zual fe a ngai a, anmahni ngei pawh an invawn fel a ngai tak zet bawk a ni, a ti a. “Sawrkarin dan leh hrai zawm tur a siamte uluk taka kan zawm tlan vek loh chuan zan hnih khat thil ah fimkhur loh avanga chhiatna vawrtawp thleng thei reng kan ni tih I hre reng ang u,” a ti bawk.
Hei bakah hian Mizoram sawrkar leh Private Hospital-te pawh COVID-19 damlo tam zawk enkawl hi chu kan hmanraw neih hrang hrangte thlirin kan la zuamlo khawp tih sawiin Minister chuan, “ZMC-ah pawh ICU khum 7 kan la nei a ni mai a, damlo pakhat  ringawt enkawl pawh a buaithlakin,  Doctor leh thawktu dangte enkawlna senso pawh a hautak hle a ni. COVID-19 damlo hi doctor zawng zawngte enkawl theih a nih loh avangin, a enkawltu bik an awm a ngai a, a damdawi tak hi khawvel mithiamten an la hmuchhuak bawk si lo a,  enkawl a buaithlakin a hautak hle a ni,” a ti a. “Thuawih tak leh fimkhur taka kan tanrual zela, thuneitute thu kan zawm that zel chuan, Pathian pawhin mal min sawmin, COVID-19 hripui hi kan la hneh ngei ang tih hi i ring tlat ang u,” a ti bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn