Finance Minister thlak turin MPCC in sawrkar phut

Mizoram Pradesh Congress Committee (MPCC) chuan MNF sawrkar chu Finance Minister thlak turin an phut.
Inrinni-a thuchhuah an siamah MPCC chuan Chief Minister, Finance Minister ni bawk, Zoramthanga chu mipuiin an duhkhawp lo hle ni a sawiin, Mizoram chu din-hmun chhe zawka a hnuhluh hma ngeia Finance Minister a nihna chu thlak a ngaih thu an sawi a. Finance Minister chu Mizoram sum dinhmun dik tak sawi thei lova puhin, awmze neilo a cheng nuai tam tak luanralna sawi mam tum-ah an puh a. Mipui in sum leh paiah eng nge dinhmun dik tak tih zawhna lian tak an neih mek laia, May ni 22-a mipui hnena a thusawi a Mizoram sum dinhmun dik tak a sawi thei lo chu Finance Minister ni zel tlak a nih loh zia chiang takin a lang tih an sawi a. Mizoram dinhmun “Pathian chauhin a hria” tia mipui zawhna a chhang pial mai mai chu mipui zahlohna dik tak a ni, an ti bawk.
Hei bakah hian MPCC thuchhuah chuan Mizoram sawrkarin cheng nuai 99 chuang senga Delhi atanga PPE a lei zingah za-a 75 vel hman tlak loh a awm ni a tarlan a nih thu pawh tar-langin, he thil ah hian mipui sum cheng nuai tam tak diklo takin a luangral ngei niin an sawi a. Hei hi Finance Minister chuan ui em em tur a nih laiin, “In kang thelh nan chuan tui nu pawh kan hmang fo,” tiin mipui hmaah sawi mam a tum niin an sawi a, hetianga Finance Minister berin awmze nei lova sum luanral a pawi ti miah lo chu Mizoram mipui tan hriatthiam theih a ni lo, an ti.
Heng avang hian Zoramthanga chu Finance Minister ni zel tlak lovah Congress Party chuan a ngai tih an thuchhuah ah chuan tarlangin, Chief Minister la ni tho mah se, Finance Department chu midang kutah dah zawk mai tura an ngen thu an thuchhuah chuan a tarlang a ni.

Comments

Chhiar Hlawhte