Mipui ten Ration buhfai an dawn theih zat hrechiang in an chan tur an chan ngei an duh

Serchhip District Civil Supply Officer (DCSO), C. Zadailova chuan Ration buhfai an sem mek chu AAY leh PHH Beneficiaries ten an sem dan hrechiangin an chan tur ang chang ngei se an duh thu a sawi.
Serchhip DCSO chuan rampum-ah inkharkhipna kalpui a nih tak avangin Mizoram sawrkar leh sawrkar laipui chuan mipuite ei leh bar-a an harsat lohna tura theihtawp chhuaha hma a lak thu sawiin, PM-GKAY hnuaiah April, May leh June thla Ration buhfai te chu AAY leh PHH te tan hian mi pakhat zelah Kg. 5 zel a thlawna sem a nih thu a sawi a. Thla hmasa khan April leh May quota hi pekchhuah a nih tawh thu sawiin, tunah hian June thla quota hi pekchhuah leh mek a nih thu leh hetah hian thil ngaihfin theih a awm avangin mipuite pawhin Ration buhfai an lak theih zat chiang taka hriain an chanpual tur an chan ngei chu an ngaih pawimawh thu a sawi a ni.
Serchhip DCSO in a sawi danin Ration pangngai an sem thin ah AAY (Ration Card Eng nei) chhungkua te chuan thla tin Kg. 35 chu Kg. ah Rs. 3/- hisap in an dawng thin a, hei hi tunah hian semchhuah mek a nih bakah AAY chhungkua te hian PM-GKAY hnuaiah Ration Card-a hming chuang mi pakhat zelin a thlawnin Kg. 5 zel an dawn belh thei dawn bawk a. Hei bakah hian National Food Security Act (NFSA) hnuaia PHH (Ration Card pawl nei) chhungkua te chuan Ration pangngai ah thlatin mi pakhat tan Kg. 8 dawng thinin hei hi sawrkar laipui leh Mizoram sawrkar in a pek a ni a. Amaherawh chu tun thla ah hian Ration buhfai Kg. 8 an dawn thin atang hian Kg. 5 chu a man tlawm, Kg. ah Rs. 3/- ah PHH beneficiaries te hian an dawng thei anga, hei bakah hian PM-GKAY atangin mi pakhat tan Kg. 5 zelin a thlawnin an dawng thei dawn bawk a, mi pakhat zelin Ration buhfai Kg. 10 dawngin heng atang hian Kg. 5 chu a thlawna dawn tur niin Kg. 5 dang chu Kg. ah Rs. 3/- hisap-a khul tur tihna a ni.
Supply Department hotute chuan rampum-a inkharkhip kalpui a nih chhungin buhfai lamah Serchhip District chuan harsatna ala tawklo tih sawiin, District chhunga khaw hrang hrangah pawh tluang taka pekchhuah chhunzawm zel a nih thu an sawi a. Tunah hian Serchhip District chhunga Supply Kudam hrang hrangah pawh buhfai chhekkhawl a tam tawk tih sawiin, mipuite tan thlaphanna tur a awmloh thu an sawi bawk.
Hei bakah hian sawrkar laipui in AAY leh PHH beneficiaries te tana a thlawna Ration Dal sem tur a tih pawh a vawikhatna atan Serchhip District-ah semchhuah fel a nih tawh thu pawh sawiin Serchhip DCSO, C. Zadailova chuan, Ration Dal hi thla thum (3) chhung sem tur a nih thu leh a rawn thlen leh hun tur erawh sawilawk mai theih ni lo mah se hun reilote ah rawn thleng leh thuai tura beisei a nih thu a sawi bawk.

Comments

Chhiar Hlawhte